Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 75 Hüküm no: 40 Orijinal metin no: [9b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Edirne’den İstanbul’a dönen padişahın maiyeti halkı ve davarları için menzil zahiresi tedariki Matlab Sene-i sâbıkın sürsat emridir. Akzâ kuzâti’l-müslimîn evlâ vülâtü’l-muvahhidîn ma‘denü’l-fazli ve’l-yakīn, hüccetü’l-hakkı ale’l-halkı ecma‘în, vârisü ulûmi’l-enbiyâ’i ve’l-mürselîn, el-muhtas bi mezîdi inâyeti’l-meliki’l-Mu‘în mevlânâ Hâslar kadısı -zîdet fezâ’iluhu- tevkī‘-i refî‘-i hümâyûn vâsıl olıcak ma‘lûm ola ki İnşâ’allâhü te‘âlâ devlet-i ikbâl ve sa‘âdet-i iclâl ile mahrûse-i Edirne’den Âsitâne-i sa‘âdetim tarafına teveccüh-i hümâyûnum [mukarrer] olmağla rikâb-ı hümâyûnumla memûr olan kapım kulları ve Istabl-ı âmirem davarları için menâzil zahîresi tedârik ve ihzârı lâzım ve mühim olmağın imdi taraf-ı mîrîden akçesi verilmek üzre her bir İstanbul kilesi arpa yirmi dörder akçeye ve dakīkin kilesi altmış akçeye ve her bir mükemmel otluk arabası yüzer akçeye ve samanın kantarı on beş akçeye ve odunun her bir çekisi yirmişer akçeye olmak üzre kazâ-i mezbûre Küçükçekmece ve Ebâ Eyyûb Ensârî nâhiyesinden iki bin kile şa‘îr ve iki yüz yirmi kile dakīk ve yalnız altmış araba otluk ve altı yüz kantar saman ve üç yüz çeki odun iştirâ ve tedârik ve Yarık Bergos menzilinde nâibinle ihzâr ve nüzül emînine teslîm ettirilmek fermânım olmuşdur. Buyurdum ki hükm-i şerîfimle ( ) vardıkda bu bâbda sâdır olan emrim üzre amel edip dahi kat‘â te’hîr ve tevakkuf eylemeyip zikr olunan zahîreyi emr-i şerîfim vardığı gibi hesâb-ı merkūm üzre mu‘accelen iştirâ ve tedârik ve nâibinle menzil-i mezbûrda zabt ve âmâde ve ordu-yı hümâyûnumda nüzül emînine teslîm ettirip ol temessükü mevkūfât defterlerine kayd ettiresin ki menzil-i mezbûrda ashâbına akçesi Hazîne-i âmiremden bi’t-tamâm edâ oluna ve zikr olunan zahîre iştirâsına mu‘âf ve gayr-ı mu‘âf dâhillerdir ale’s-seviyye her birinin tahammüllerine göre tevzî‘ ve iştirâ ettirdip kimesneye ta‘allül ve nizâ‘ ettirmeyesin ve tevzî‘ defterinin bir sûretin imzâlayıp ve mühürleyip mübâşir-i mezbûr ile südde-i sa‘âdetime irsâl eyleyesin el-hâsıl husûs-ı mezbûre ihtimâm üzre olup sonradan tecessüs olundukda hilâfı zuhûrundan ziyâde hazer eyleyesin şöyle bilesin alâmet-i şerîfe i‘timâd kılasın. Tahrîren fi’l-yevmi’s-sâlis [min] şehri Recebi’l-ferd sene isneteyn ve seb‘în ve elf. Vasale ileynâ fi’l-yevmi’s-sâdis aşer sene 1072. El-mahrûse-i Edirne.