Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 77 Hüküm no: 43 Orijinal metin no: [10a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dâye Hatun Vakfı’ndan bazı eşyaların mütevelli Mehmed Beşe b. Ahmed’de olduğu Yâ Rezzâk zü’l-kuvveti’l-metîn Havâss-ı Aliyye kazâsı a‘mâlinden Terkos nâhiyesine tâbi‘ Dâye Hâtun karyesinde sâkin râfi‘ü’l-kitâb Mehmed Beşe b. Ahmed nâm kimesne meclis-i şer‘de takrîr-i kelâm edip merhûme Dâye Hâtun medîne-i Hazret-i Ebâ Eyyûb Ensârî -dâme fî rıdvâni’l-Bârî Takyecibaşı mescidi mukābelesinde binâ eylediği mu‘allimhâne ve eczâ-i şerîfe mesârifi için vakf eylediği çiftlik ve mandıra ve çayır ve mevâşînin tevliyyeti aslah-ı utekāya şart etmekle mukaddemâ mütevellî olan Hasan Beşe fevt olmağın nevbet-i tevliyyet bana gelmeğin çiftlik-i mezbûru ben zabt u tasarruf ve erbâb-ı vezâyife vazîfelerini edâ ederim el-hâletü hâzihî evkāf-ı mezbûreden yedimde olan mevâşî ve sâir eşyânın adedi ikrârım üzre tahrîr ve hüccet-i şer‘iyye olunmak murâdımdır deyicek mu‘allimhâne-i mezkûr mu‘allimi ve zeyl-i kitâbda muharrerü’l-esâmî olan müslimîn merkūm Mehmed Beşe’nin takrîrine muvâfık haber verdiklerinde mütevellî-i mezbûr dahi vakf-ı mezbûrdan hâlâ yedimde on beş re’s camus ineği ve dört re’s dana ve bir çift kara sığır öküzü ve bir kebîr kazgan ve bir kebîr saban demiri ve bir çireşne vardır deyû ikrâr ve i‘tirâf etmeğin vâki‘ü’l-hâl hıfzan li’l-makāl bi’t-taleb ketb olundu. Fi’l-yevmi’s-sâbi‘ aşer min şehri Recebi’l-ferd li sene isneteyn ve seb‘în ve elf. Şuhûdü’l-hâl: Ahmed Efendi el-Mu‘allim, el-Hâc Nasuh Beşe, İbrahim Çelebi, Hamza Efendi.