Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 78 Hüküm no: 44 Orijinal metin no: [10a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi’nin donanmaya ait batan bir gemide olduğu ve boğulduğunun tespiti Mahmiye-i İstanbul’da Sultan mahallesi sâkinlerinden bâ‘isetü’l-vesîka Hayrünnisa bt. Hüseyin nâm hâtun meclis-i şer‘de kayın atası Ebûbekir Çelebi b. Ali mahzarında üzerine takrîr-i da‘vâ edip mezbûr Ebûbekir Çelebi’nin oğlu zevcim Ali Çelebi nâm râcil târih-i kitâbdan on yedi ay mukaddem Bahr-i Siyâh donanma-yı hümâyûnuna memûren gidip lâkin ol donanma gemilerinden ba‘zısı bi emrillâhi te‘âlâ gark olmağla zevcim mezbûr dahi garîkan fevt olmuşken babası mezbûr Ebûbekir Çelebi oğlu müteveffâ-yı mezbûrun muhallefâtını beynimizde alâ mâ farazallâhu te‘âlâ tevzî‘ ve taksîmden imtinâ‘ eder suâl olunup taksîmine tenbîh olunmak matlûbumdur deyicek gıbbe’s-suâl mezbûr Ebûbekir Çelebi oğlu mezbûr Ali Çelebi’nin fevtini inkâr ile cevâb vermeğin zevcesi müdde‘iye-i mezbûreden müdde‘âsını mübeyyine beyyine taleb olundukda, udûl-i ricâlden olup kasaba-i Tophâne’de Kulekapısı’nda sâkin Ali Beşe b. Nasuh ve kasaba-i mezbûrda Hâce Ali mahallesinde sâkin Ömer Beşe b. Abdullah nâm râciller li ecli’ş-şehâde makām-ı kazâya hâzırân olup isre’l-istişhâd fi’l-vâki‘ mezbûr Ali Çelebi kendi odamız yoldaşlarından olup ol donanmada bizim odamız Nohûdî Mustafa Kapudan gemisine ta‘yîn olunmağla, cümlemiz ol ile idik, lâkin ol fırtına günü biz bir husûs için kethüdâ gemisine binmişdik bi emrillâh fırtına olup merkūm Mustafa Kapudan’ın gemisi önümüzde pâre pâre olup merkūm Ali Çelebi dahi deryâya gark olduğunu re’yü’l-ayn müşâhede ve mu‘âyene olunmuşdur. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle mezbûr Ali Çelebi’nin mevtine hüküm ve muhallefâtı vârisleri beyninde taksîme babası mezbûr Ebûbekir Çelebi’ye tenbîh birle mâ hüve’l-vâki‘ kayd şüd. Fi’l-yevmi’s-sâdis aşer min şehri Recebi’l-ferd li sene isneteyn ve seb‘în ve elf. Şuhûdü’l-hâl: El-Hâc Mahmud b. Murad, Ahmed Ağa b. Mehmed, Mehmed Beşe b. Hüseyin, Yusuf b. Abdullah, Ali Çelebi b. Halil, Hüseyin Muhzır ve gayruhüm mine’l-hâzırîn.