Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 80 Hüküm no: 47 Orijinal metin no: [10b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Bey b. Halil’in Cafer Paşa Vakfı malından mütevelliye verdiği meksûr guruşları tamamlaması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ merhûm Cafer Paşa vakfı’na bi’l-fi‘l mütevellî olan Mehmed Bey b. Ahmed nâm kimesne meclis-i şer‘de medîne-i mezbûrede sâbıkan Yenihamam hamamcısı olan Mehmed Bey b. Halil mahzarında üzerine da‘vâ ve takrîr-i kelâm edip mezbûr Mehmed Bey mâl-ı vakf-ı mezbûrdan bin elli sekiz târihine üç yüz yirmi kıt‘a riyâlî-i kebîr guruş istirbâh ve kabz ve bundan akdem evkāf-ı mezbûre mütevellîsi olup hâlâ ma‘zûl olan Halil Çelebi b. Hüdâverdi’ye târih-i kitâbdan bir sene mukaddem meksûr guruş edâ etmeğin ol dahi kabz ve mâl-ı vakfa gadr ve te‘addî edip hîn-i muhâsebede zikr olunan üç yüz yirmi guruşu yedişer dirhem olmak üzre teslîm murâd eder el-hâletü hâzihî mezbûrândan her birine suâl olunup ihkāk-ı hak olunmak bi’t-tevliyye murâdımdır deyicek gıbbe’s-suâl evvelâ mezbûr Mehmed Bey cevâbında fi’l-hakīka bin elli sekiz târihinde mâl-ı vakf-ı mezbûrdan tâmmü’l-vezn ve sahîhü’l-ayâr üç yüz yirmi kıt‘a riyâlî kebîr guruş târih-i mezbûrda vakıf mütevellîsi olan ( ) nâm kimesne yedinden istirbâh ve kabz eylemişimdir lâkin târih-i kitâbdan bir sene mukaddem mezbûr Halil Çelebi vakf-ı mezbûre mütevellî iken sâlifü’z-zikr üç yüz yirmi guruşu def‘ ve teslîm eylediğimde ol dahi kabz ve tesellüm eylemişdir deyû tâmmü’l-vezn ve sahîhü’l-ayâr kabz eylediğini ikrâr etmeğin isre’l-istintâk mütevellî-i sâbık mezbûr Halil Çelebi dahi cevâbında fi’l-vâki‘ mezbûr Mehmed Çelebi yedinden zikr olunan üç yüz yirmi kıt‘a riyâlî guruşu yedişer dirhem olmak üzre kabz eylemişimdir deyû mütevellî-i sâbık merkūm Halil Çelebi mârrü’z-zikr üç yüz yirmi kıt‘a riyâlî guruşdan yedişer dirhemden ziyâde kabz eylemediğine ba‘de talebi’l-beyyine ani’l-müdde‘î ve’l-acz ani’l-ityân yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin alâ mûcebi ikrârihî zikr olunan meksûr guruşları itmâmına merkūm Mehmed Bey’e tenbîh-i şer‘î birle mâ hüve’l-vâki‘ bi’t-taleb ketb olundu. Tahrîren fî gurreti Recebi’l-ferd li sene isneteyn ve seb‘în ve elf. Şuhûdü’l-hâl: Mustafa Çelebi b. Pervâne, Diğer Mustafa Çelebi b. Hüdâverdi, Mehmed Çelebi b. ( ) Çukadâr, Hüseyin Çelebi b. Ali ve gayruhüm mine’l-hâzırîn. Beyaz, Sahh.