Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 79 Hüküm no: 46 Orijinal metin no: [10b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çoban Yorgi’nin yoğurtçu Hristo v. Nikola’ya borcu karşılığı süt vermesi Yoğurtçu tâifesinden râfi‘ü’r-rakīm Hristo v. Nikola nâm zimmî meclis-i şer‘de çoban tâifesinden Yorgi v. Nikola Narzakî muvâcehesinde üzerine da‘vâ ve takrîr-i kelâm edip aded ve esmânı beynimizde ilm-i şer‘î birle ma‘lûm yedimden müşterâ ve makbûz koyun bahâsından merkūm Yorgi zimmetinde ba‘de külli hesâb on dört bin akçe hakkım olup meblağ-ı mezbûr için si‘r-i cârî üzerine bana tahte’l-hesâb beher yevm koyun sütü vermek üzre ta‘ahhüd ve iltizâm etmişdir hâlâ suâl olunup takrîr olunmak matlûbumdur deyicek gıbbe’s-suâl merkūm çoban Yorgi cevâbında fi’l-vâki‘ aded ve esmânı beynimizde ilm-i şer‘î ma‘lûm yedinden müşterâ ve makbûz koyun bahâsından ba‘de külli hesâb merkūm yoğurtçu Hristo’ya zimmetimde lâzımü’l-edâ on dört bin akçe deynim vardır ve meblağ-ı mezbûr için si‘r-i cârî üzre mezbûre beher yevm tahte’l-hesâb koyun sütü vermeğe müte‘ahhid olmuşdum, lâkin koyunları hâlâ merkūm Hristo’nun zabt ve taht-ı yedinde olan Ferhad Paşa yaylağında yayladırım deyicek merkūm Hristo dahi mersûmun koyunlarını yaylak-ı merkūmda yaylattırmasına râzı olmağın vâki‘ü’l-hâl bi’l-ibtigā sebt olundu. Fi’l-yevmi’s-sâdis aşer min şehri Recebi’l-ferd li sene isneteyn ve seb‘în ve elf. Şuhûdü’l-hâl: Ali b. Hüseyin, Hamza Efendi nâib-i recül, Mehmed b. Mahmud Muhzır, Hüseyin b. Hasan, Süleyman Beşe el-Kettânî ve gayruhüm mine’l-hâzırîn.