Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 84 Hüküm no: 49 Orijinal metin no: [11b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Silivri’den Mihal v. Andon’un evini Yorgi v. İstamo’ya vefâen satması Havâss-ı Aliyye kazâsı tevâbi‘inden Silivri nâhiyesine tâbi‘ Şahtoros nâm karye sükkânından Mihal v. Andon nâm zimmî meclis-i şer‘de meyhâneci tâifesinden işbu râfi‘ü’l-kitâb Yorgi v. İstamo nâm zimmî muvâcehesinde bi’t-tav‘ ve’r-rızâ lâ-bi’l-kerh ve’l-cezâ ikrâr ve takrîr-i kelâm edip emlâkimden olup karye-i mezbûrede vâki‘ bir tarafdan Sivastos nâm zimmî mülkü ve bir tarafdan Baba Panayot mülkü ve bir tarafdan yine âhar mülküm ve taraf-ı âharı tarîk-i âm ile mahdûd, bir bâb fevkānî odayı ve bir mikdâr havluyu müştemil mülk menzilimi cümle tevâbi‘ ve levâhıkı ile mezbûr Yorgi’ye tarafeynden îcâb ve kabûlü hâvî bey‘ bi’l-vefâ tarîki üzre yedi bin nakd-i râyic fi’l-vakt akçeye bey‘ ve teslîm edip ol dahi minvâl-i muharrer üzre iştirâ ve kabûl eyledikden sonra yine karye-i mezbûre sınırı dâhilinde vâki‘ bir tarafdan Bereket nâm zimmî bahçesine ve bir tarafdan Katır nâm zimmî tarlası ve iki tarafdan tarîk-i âm ile mahdûd olup tahmînen dört dönüm bir kıt‘a tarlamın dahi hakk-ı tasarrufunu sâhib-i arz ma‘rifetiyle mezbûr Yorgi’ye bin akçe bedel mukābelesinde ferâğ ve tefvîz edip ol dahi tefevvüz ve kabûl eyleyip semen-i mezbûr yedi bin akçe ile bedel-i mersûm bin akçe ki cem‘an seksen bin akçeyi merkūm Yorgi yedinden tamamen alıp kabz eyledim ba‘de’l-yevm târih-i kitâbdan dört yüz elli gün tamâmına değin meblağ-ı mezbûru merkūm Yorgi’ye edâ ve teslîm edemez isem bey‘-i mezbûr bâtta münkalib olup menzil-i mahdûd-ı mezkûr merkūm Yorgi’nin mülk-i mahzı ve mârrü’z-zikr bir kıt‘a tarla merkūmun tasarrufunda olup emsâli gibi mutasarrıf olsun dedikde mukırr-ı mezbûrun minvâl-i meşrûh üzre cereyân edip cemî‘ ikrâr ve i‘tirâfını merkūm Yorgi vicâhen ve şifâhen tasdîk ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Recebi’l-ferd li sene isneteyn ve seb‘în ve elf. Şuhûdü’l-hâl: El-Hâc Hasan b. Abdullah, el-Hâc Mehmed b. Ahmed, el-Hâc Mehmed b. Musa, Hüseyin Çelebi b. Hüseyin, Hüseyin Çelebi b. Ali ve gayruhüm mine’l-hâzırîn