Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 85 Hüküm no: 50 Orijinal metin no: [11b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Şaban’ın evini eşi Ayşe bt. Mustafa’ya satması Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de vâki‘ Nazperver mahallesi sâkinlerinden el-Hâc Mustafa b. Şaban nâm kimesne tarafından bey‘-i câ’i’z-zikri ikrâra vekîl olup Davud Efendi b. Mehmed el-İmâm ve Ali Çelebi b. Mehmed nâm kimesneler şehâdetleri ile şer‘an vekâleti sâbite olan Bektaş Bey b. İshak nâm vekîl meclis-i şer‘de müvekkil-i mezbûrun zevcesi râfi‘atü’l-vesîka Ayşe bt. Mustafa tarafından ikrâr-ı âti’l-beyânı tasdîke vekîl olup bimâ hüve nehci’s-sübût vekâleti sâbite olan umdetü’l-a‘yân Ali Çelebi b. Mehmed nâm vekîl mahzarında bi’l-vekâle ikrâr ve takrîr-i kelâm edip müvekkil-i mezbûr el-Hâc Mustafa’nın emlâkinden olup mahalle-i mezbûrede vâki‘ bir tarafdan Sitti Hâtun vakfı ve bir tarafdan müvekkilim el-Hâc Mustafa mülkü ve bir tarafdan dere ve taraf-ı râbi‘i tarîk-i hâs ile mahdûd iki bâb tahtânî odaları ve müşterek su kuyusunu ve zât-ı eşcâr müsmire ve gayr-ı müsmire hadîkayı ve kenîfi müştemil menzilimi cümle tevâbi‘i ve levâhıkı ile zevcesi müvekkile-i mezbûre Ayşe Hâtun’a târih-i kitâbdan altı sene mukaddem on bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip târih-i mezbûrda minvâl-i muharrer üzre iştirâ ve tesellüm ve kabz u kabûl eyleyip semeni olan mezbûrü’n-na‘t on bin akçeyi müvekkile-i mezbûre Ayşe Hâtun yedinden tamamen alıp kabz eyledim min ba‘d menzil-i mahdûd-ı mezkûrda benim vechen mine’l-vücûh alâkam ve medhalim yokdur zevce-i müvekkile-i mezbûre Ayşe Hâtun’un mülk-i müşterâsıdır. Keyfe mâ yeşâ’ mutasarrıf olsun dedi deyicek vekîl-i mezbûrun minvâl-i meşrûh üzre bi’l-vekâle cârî ve sâdır olan ikrârını vekîl-i âhar Ali Çelebi bi’l-vekâle vicâhen ve şifâhen tasdîk ve tahkīk etmeğin mâ vaka‘a bi’t-taleb ketb olundu. Fi’l-yevmi’t-tâsi‘ aşer [min] Recebi’l-ferd li sene isneteyn ve seb‘în ve elf. Şuhûdü’l-hâl: Mehmed b. Abdülganî, İlmüddin Efendi el-İmâm, Ömer Çelebi b. Hüseyin, Mustafa Çelebi b. Abdullah, Osman Bey b. Mustafa ve gayruhüm mine’l-huzzâr.