Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 89 Hüküm no: 55 Orijinal metin no: [12b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fotini bt. Esteryano’nun eşyalarını üvey oğlu Manol v. Todori’ye hibe etmesi Mahmiye-i İstanbul hısnı ebvâbından hazret-i Ebâ Eyyûb el-Ensârî kapısı dâhilinde vâki‘ Mustafa Paşa-yı Atîk mahallesinde sâkine Fotini bt. Esteryano nâm nasrâniye meclis-i şerî‘at-ı şerîfde üveyi oğlu işbu râfi‘ü’l-vesîka Manol v. Todori nâm zimmî muvâcehesinde bi’t-tav‘ ve’r-rızâ lâ-bi’l-kerh ve’l-cezâ ikrâr-ı tâmm ve takrîr-i kelâm edip hibe-i âti’z-zikrin sudûruna değin zabt ve taht-ı tasarrufunda olan emlâkimden yirmi bin nakd-i râyic fi’l-vakt akçe ve yüz miskāl altın bilezik ve yüz kırk paftalı civân kaşı ta‘bîr olunur bir sîm kuşağı üveyi oğlum mezbûr Manol’e hibe ve temlîk ve teslîm edip ol dahi meclis-i hibede minvâl-i muharrer üzre ittihâb ve tesellüm ve kabz ve kabûl eyleyip mârrü’z-zikr eşyâ-i mezkûre-i mevhûbe mukābelesinde üveyi oğlu mezbûr Manol on bir aded sikke-i hasene bana def‘ ve teslîm edip ben dahi mezbûre yedinden ivaz-ı mezbûr on bir sikke-i haseneyi alıp kabz eyledim. Mezbûr sâlifü’z-zikr eşyâ-i mezbûrede vechen mine’l-vücûh ve sebeben mine’l-esbâb benim alâka ve medhalim yokdur. Üveyi oğlum merkūm Manol’ün mülk-i mevhûbudur, keyfe mâ yeşâ’ ve yahtâr mutasarrıf olsun deyicek mukırra-i merkūma Fotini nasrâniyenin vech-i mübeyyen üzre cârî ve sâdır olan ikrârını merkūm Manol bi’l-muvâcehe tasdîk ve bi’l-müşâfehe tahkīk ettikden sonra merkūm Manol zimmî vâhibe-i mersûmeyi infâk ve iksâya meclis-i şer‘de ta‘ahhüd etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Mehmed Çelebi b. Hızır, Şâhin Bey b. Abdullah, Mehmed Beşe b. Hüseyin, Hüseyin Çelebi b. Ali ve gayruhüm mine’l-hâzırîn.