Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 88 Hüküm no: 54 Orijinal metin no: [12a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şücâüddin b. İbrahim’in vakfettiği ev ve dükkânı konusundaki anlaşmazlığın sulh ile halledildiği Medîne-i Hazret-i Ebâ Eyyûb-i Ensârî -dâme fî rıdvâni’l-Bârî-’de Kasımpaşa mahallesinde vâki‘ bir tarafdan el-Hâc Mustafa vakfı ve bir tarafdan ve bir tarafdan Kasımpaşa bostanı ve bir tarafdan Medîne-i münevvere vakfı ve bir tarafdan tarîk-i âm ile mahdûd menzil ve tahtında olan Horasanî dükkânını merhûm Şücâeddin b. İbrahim nâm sâhibü’l-hayr dokuz yüz otuz sekiz târih-i Muharremi gurresinden vakf-ı sahîh-i lâzım ile vakf ve haps edip süknâsı kendiden sonra utekāsına ve evlâd-ı utekāsına ve evlâd ve evlâd-ı utekāsına ba‘de’l-inkırâz mahalle-i mezbûre imâmı ve müezzinlerine şart ve ta‘yîn etmekle vâkıf-ı mezbûrun utekāsı Yusuf nâm kimesnenin kızı Ayşe’nin kızı Fâtıma’nın sulbî kebîr oğlu es-Seyyid Ali b. es-Seyyid ( ) nâm kimesne meclis-i şer‘de mahalle-i mezbûre imâmı ve müezzinleri olan râfi‘atü’l-kitâb eş-Şeyh İlmüddin Efendi b. Süleyman ve Mustafa Çelebi b. Mehmed ve Abdi b. Mustafa nâm kimesneler mahzarlarında ikrâr ve takrîr-i kelâm edip merhûm vâkıf-ı mezbûr menzil-i mahdûd-ı mezkûrun süknâsı bâlâda bast ve tahrîr olunduğu üzre şart ve ta‘yîn edip lâkin yine medîne-i Gelibolu’da sâkin olmağla mahalle-i mezbûre imâmı ve müezzinleri mezbûrûn eş-Şeyh İlmüddin Efendi ve Mustafa Halîfe ve Abdi menzil-i mezbûra vaz‘-ı yed murâd eylediklerinde ben dahi menzil-i mezbûrun süknâsını vâkıf-ı mezbûr süknâya muhtâc olmak üzre size şart ve ta‘yîn eylemişdir sizin hod süknâya ihtiyâcınız yokdur deyû cevâb verdiğimde, beynimizde münâza‘ât-ı kesîre cereyân etmişidi el-hâletü hâzihî menzil-i mezbûr ve dükkân-ı merkūmun yevmî altı akçe icâresinin dört akçesini ben hayâtda oldukça ve iki akçesini imâm ve müezzinler alıp ta‘mîr ve termîm lâzım geldikde yine icâreden olmak üzre vesâtat-ı muslihîn ile mezbûrûn ile sulh olup her birimiz sulh-i [12b] mezbûru kabûl ve zikr olunan altı akçe icârenin min ba‘d dördünü ben ve ikisini anlar almak üzre kavl ü ittifâk eyledik dediklerinde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Receb Çavuş el-Mübâşir, İbrahim Çavuş el-Mübâşir, Mehmed Çelebi b. Veli, İbrahim Çelebi el-Attâr, İbrahim Halîfe b. Hasan ve gayruhüm mine’l-hâzırîn.