Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 91 Hüküm no: 57 Orijinal metin no: [12(2)a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bal tüccarı Hacı Osman b. Ferhad ile Hacı Ebûbekir b. Mehmed’in mudârebe ortaklıklarıyla ilgili anlaşmazlığından sulh olmaları Balcı tâifesinden el-Hâc Osman b. Ferhad nâm kimesne mahfil-i kazâda yine tâife-i mezbûreden el-Hâc Ebûbekir b. Mehmed nâm kimesne mahzarında üzerine takrîr-i da‘vâ edip târih-i kitâbdan iki sene mukaddem asel iştirâ ve bey‘ edip bi fazlillâh hâsıl olan fâide beynimizde tasnîf olmak üzre alâ tarîki’l-mudârebe mezbûr el-Hâc Ebûbekir’e iki yüz kıt‘a riyâlî guruşa def‘ ve teslîm, ol dahi kabz ve tesellüm etmişidi hâlâ taleb eylediğimde teslîmden imtinâ‘ eder suâl olunup alıverilmek matlûbumdur deyicek gıbbe’s-suâl mezbûr el-Hâc Ebûbekir cevâbında fi’l-hakīka hâl minvâl-i muharrer üzre olmuş idi, lâkin zikr olunan iki yüz riyâlî guruş mâl-ı mudârebe ile asel iştirâ edip âdet-i me’lûfe üzre ol aseli gemiye ve İstanbul’a irsâl eylediğimde bi emrillâh gemi Bahr-i Siyâh’da gark olup benim ve sâir tüccârın rızkı bilâ-te‘ad deryâda zâyi‘ olmuşdur deyicek müdde‘î-i mezbûrdan merkūm el-Hâc Ebûbekir te‘addîsini mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûr el-Hâc Ebûbekir’e zikr olunan mâl-ı mudârebe ile iştirâ olunan aselin vech-i muharrer üzre deryâda zâyi‘ olmakda te‘addîsi olmadığına yemîn teklîf olundukda, ol dahi alâ vefki’l-mes’ûl yemîn billâhi te‘âlâ etmeğin mûcebiyle mezbûr el-Hâc Osman bî-vech ta‘arruzdan ba‘de’l-men‘, mezbûr el-Hâc Osman meclis-i mezbûrda merkūm el-Hâc Ebûbekir mahzarında ikrâr edip yine vech-i muharrer üzre mâl-ı mudârebeden merkūm el-Hâc Ebûbekir zimmetinde beş yüz riyâlî guruş hakkım olup taleb eylediğimde diyâr-ı Eflak’da asel cem‘ ve iştirâ eyledikde hırsızlar basıp mâl-ı mezkûru gāret etmişlerdir deyû cevâb vermeğin beynimizde münâza‘ât-ı kesîre cereyân etmiş idi el-hâletü hâzihî vesâtat-ı muslihîn ile merkūm el-Hâc Ebûbekir ile da‘vâ-yı mezkûrumdan on beş bin nakd-i râyic fi’l-vakt akçe üzerine sulh olup bedel-i sulh yedinden tamamen kabz ve mâ‘adâ da‘vâsından zimmetini ibrâ ve iskāt eyledim min ba‘d mezbûr ile evvelen ve sâniyen zikr olunan mâl-ı mudârebeye müte‘allik da‘vâ ve nizâ‘ım yokdur deyicek gıbbe’t-tasdîki’ş-şer‘i’l-mu‘teber mâ cerâ bi’t-taleb ketb olundu. Fi’l-yevmi’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Bayram b. Abdurrahman, el-Hâc Mehmed b. Ali, Ferhad Beşe b. Ahmed, Mehmed Çelebi Çukadâr, Hüseyin b. Hasan ve gayruhüm mine’l-hâzırîn.