Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 92 Hüküm no: 58 Orijinal metin no: [12(2)a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Ağa b. Bektaş Ağa’nın kölesi Yusuf b. Abdullah’ı âzat etmesi Medîne-i hazret-i Ebâ Eyyûb el-Ensârî’de vâki‘ Kasımpaşa mahallesi sâkinlerinden fahrü’l-a‘yân Mehmed Ağa b. el-merhûm Bektaş Ağa tarafından akd-i âti’z-zikri ikrâra vekîl olup Şâhin Bey b. Abdullah ve Pîr Mehmed Çelebi b. Mustafa şehâdetleri ile şer‘an vekâleti sâbite olan Mehmed Çelebi b. Abdullah nâm vekîl mahfil-i şer‘de bi’l-vekâle ikrâr ve takrîr-i kelâm edip müvekkil-i mûmâ-ileyh Mehmed Ağa işbu uzun boylu, elâ gözlü, kır sakallı, sol ayağının bir parmağı sakat Rûsiyyü’l-asl râfi‘ü’l-kitâb Yusuf b. Abdullah abd-i memlûkünü hasbeten li’llâhi’l-azîm ve haseneten li rûhi resûlihi’l-kerîm ve amelen bimâ kāle’n-nebiyyü -sallallâhu te‘âlâ aleyhi ve sellem- men a‘taka rakabeten mü’mineten a‘takallâhu te‘âlâ bi külli uzvin minhâ uzven minhu mine’n-nâr, cemî‘ malından ihrâc ve i‘tâk ve tahrîr ve zümre-i ahrâr-ı asliyyîne ilhâk ve idrâc edip min ba‘d abd-i mevsûf-ı mezbûrun üzerinde hakk-ı velâdan gayrı hakkım kalmadı ba‘de’l-yevm sâir ahrâr-ı asliyyîn gibi hür olsun dedi deyû bi’l-vekâle ikrâr etmeğin hâkim-i muvakki‘-i sadr-ı kitâb kıbelinden sıhhat-i ıtk-ı mezkûra hükm birle mâ hüve’l-vâki‘ [bi’t-taleb] ketb olundu. Fi’l-yevmi’l-hâmis ve’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Hüseyin Beşe er-Râcil, İbrahim Beşe b. Abdullah, Mustafa Beşe b. Mehmed, Osman Beşe b. Abdullah, Mehmed Çelebi b. Ahmed, İbrahim Efendi el-İmâm ve gayruhüm mine’l-hâzırîn.