|
Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662)
cilt: 28, sayfa: 94
Hüküm no: 61
Orijinal metin no: [13a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Hacı Ahmed Ağa b. Mustafa’nın konağına su tahsisi
Dârü’l-hilâfeti’l-aliyye Kostantıniyyet el-mahmiyye’de Sultan Bayezid hamamı kurbunda vâki‘ Sekbanbaşı Yakub mahallesi sâkinlerinden olup sâbıkan Ayasofya mütevellîsi olan kıdvetü’l-emâcid ve’l-e‘âzim câmi‘ü’l-mehâmid ve’l-mekârim Manisalı el-Hâc Ahmed Ağa b. Mustafa taraf-ı bâhirü’ş-şereflerinden Ali b. Ebûbekir ve Hasan Çelebi b. Abdullah şehâdetleri ile husûs-ı âti’z-zikre vekîl olup bimâ hüve nehci’s-sübût şer‘an vekâleti sâbite olan fahrü’l-emâsil ve’l-eşbâh kîsedâr Mustafa Çelebi b. Receb meclis-i şer‘-i şerîf-i şâmihü’l-imâd ve mahfil-i dîn-i münîf-i râsihü’l-evtâdda bi’l-vekâle takrîr-i kelâm edip müvekkilim müşârün-ileyh el-Hâc Ahmed Ağa’nın mahalle-i mezbûrede vâki‘ mülk menziline cârî olmak için Havâss-ı Refî‘a kazâsı müzâfâtından Terkos nâhiyesinde vâki‘ Derbendyolu demekle ma‘rûf mevzi‘de kendi malıyla âbâr-ı müte‘addide hafr ettirdip cem‘ ve tahsîl eylediği miyâhın üzerine varılıp mâ’ının erbâb beyninde mu‘tâd olan tarz-ı ma‘rûf ve semt-i me’lûf üzre mikdârı vezn ve tağyîr ve tahrîr olunmak bi’l-vekâle matlûbumdur deyicek cânib-i şerî‘at-ı mutahharadan mevlânâ Mehmed Efendi b. Hasan irsâl olunup ol dahi hâssa su yolu nâzırı aynü’l-a‘yân zeyinü’l-ezmân makbûlü’s-sudûr ve’l-erkân Mustafa Ağa b. İbrahim ve râh-ı âbîler kethüdâsı Osman Bey b. Murtaza ve el-Hâc Abbas b. Mehmed Ser-bölük ve Üstâd el-Hâc Abdülmümin b. Yakub ve Üstâd Ahmed b. Abdünnebî ve Üstâd İsmail b. İvaz zeyl-i kitâbda muharrerü’l-esâmî olan cemâ‘at-i müslimîn ile müvekkil-i mûmâ-ileyhin cem‘ ve tahsîl eylediği suyun üzerine varılıp ale’l-vechi’l-âde keşf ve müşâhede ve tahmîn-i sahîh ile tahmîn ve takvîm olundukda, kâmil üç masura su cârî olup zikr olunan suyu ol mahalle karîb Mesih Paşa merhûm su yoluna, andan dahi merhûm ve mağfûrun-leh Sultan Süleyman Hân suyu yoluna izn-i mütevellî ile ilhâk ve kānûn-ı kadîm üzre bir masurası hakk-ı mecrâ alıkonuldukdan sonra bâkī iki masurasın murâd eylediği mahalden ifrâz ve müvekkil-i mûmâ-ileyh el-Hâc Ahmed Ağa’nın mahalle-i mezbûrede vâki‘ sâlifü’z-zikr menziline cârî olmak üzre te‘ayyün olunduğunu mevlânâ-yı mezbûr mahallinde ketb ve tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ cerâ bi’l-ibtigā sebt olundu. Fi’l-yevmi’s-sâbi‘ ve’l-ışrîn min şehri Recebi’l-ferd li sene isneteyn ve seb‘în ve elf.
Şuhûdü’l-hâl: Fahrü’l-eimme Veli Efendi b. İsmail, Ahmed Efendi b. Hasan el-İmâm, es-Seyyid Mahmud Efendi b. es-Seyyid Eyüb, el-Hâc Abdülfettâh b. Abdüllatîf, umdetü’l-a‘yân Ali Ağa b. Mustafa, Mahmud Ağa karındaşı, camcı Ali Beşe, el-Hâc Hasan b. Behram sâkin-i mahalle-i mezbûre, diğer Ali Bey b. Ebûbekir, Ahmed Çelebi b. el-Hâc Yusuf sâkin-i mahalle-i mezbûre, Yahya Çelebi b. Yusuf sâkin-i mahalle-i mezbûre, Korucuzâde Mehmed Beşe b. Hasan er-Râcil, Mehmed Beşe b. Durmuş, berber Mustafa b. Abdullah er-Râcil, Hasan Çelebi b. Abdullah, es-Seyyid Abdurrahman Çelebi b. es-Seyyid Mustafa sâkin-i mahalle-i mezbûre, Mustafa Çelebi b. el-Hâc Hızır, el-Hâc Ali el-Hüddâm? el-Hâc Ali b. Hızır ve gayruhüm mine’l-hâzırîn, [Derkenâr:] İşbu derûn-ı hüccetde ismi mezkûr sâbıkan Ayasofya mütevellîsi Manisalı el-Hâc Ahmed Ağa hânesi demekle arîf konak-ı kebîre cârî iki masura mâ-i lezîz-i cârînin bir masurasına hâlâ Darbhâne-i âmire nâzırı sa‘âdetlü Yusuf Ağa bir kıt‘a temlîknâme-i hümâyûn mantûkunca mâlik olduğunu müş‘ir erbâb-ı ihtiyâr ma‘rifetleriyle mufassal ve meşrûh bir kıt‘a hüccet-i şer‘iyye i‘tâ olunduğunu müş‘ir işbu mahalle şerh verildi. Fî 24 min Şevvâl sene 1204. Sahh. Kezâlik konak-ı kebîrden müfrez menzil derûnunda cârî Ayasofya mâ-i lezîzinde tedâvül-i eyâdî ile bâ hüccet-i mübâya‘a mâlike olan İsmihan Hâtun bt. Cağalzâde İbrahim Bey yedine erbâb-ı miyâh ma‘rifetiyle mufassal ve meşrûh hüccet tahrîr ve i‘tâ olunduğu, işbu mahalle şerh verildi. Fî 24 Şevvâl sene 1204. Sahh.
 
|
