Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 93 Hüküm no: 60 Orijinal metin no: [12(2)b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Ahmed’in boşandığı kocası Ahmed Beşe b. Ali ile anasının zimmetlerini ibrâ etmesi Mahmiye-i İstanbul’da Karabaş mahallesi sâkinelerinden Fâtıma bt. Ahmed nâm hâtun meclis-i şer‘de Havâss-ı Aliyye kazâsı tevâbi‘inden İzdinli nâm karye sükkânından zevci işbu râfi‘ü’l-kitâb Ahmed Beşe b. Ali nâm kimesne tarafından hul‘-ı câ’i’z-zikri tasdîke vekîl olup vekâleti sâbite olan el-Hâc Receb Çelebi b. Arslan ve Ali Beşe b. Süleyman şehâdetleri ile şer‘an vekâleti sâbite olan vâlidesi Ümmühâni bt. Ahmed nâm hâtun mahzarında ikrâr ve takrîr-i kelâm edip müvekkil-i mezbûr Ahmed Beşe zevcim olup lâkin hüsn-i mu‘âşeretimiz olmamağla beynimizde şikāk-ı küllî vâki‘ olmağın mezbûrun zimmetinde mukarrer olan iki bin akçe mehr-i müeccel ve nafaka-i iddet ve me’ûnet-i süknâmdan fâriğa olmak üzre zevcim müvekkil-i mezbûr Ahmed Beşe ile muhâla‘a-i sahîha-i şer‘iyye ile muhâla‘a edip zevciyyete müte‘allik âmme-i de‘âvîden ibrâ ve iskāt ve zevcim müvekkil-i mezbûrun li ebeveyn karındaşı olup mukaddemâ benim zevcim iken vefât etmekle mezbûrun zimmetinde mütekarrir olan iki bin akçe mehr-i müeccelimi muhallefâtından ahz ü kabz edip sâir muhallefâtda mezbûr Ahmed Beşe ve vâlidesi vekîl-i mezbûr Ümmühâni Hâtun vaz‘-ı yed etmeleriyle muhallefât-ı mezbûrda hisse-i şer‘iyyem da‘vâsından dahi müvekkil-i mezbûr Ahmed Beşe’nin vâlidesi mezbûre Ümmühâni Hâtun’un zimmetlerini ibrâ-i kātı‘ü’n-nizâ‘la ibrâ ve iskāt eyledim min ba‘d mezbûrân ile husûs-ı mezbûra müte‘allik da‘vâ ve nizâ‘ım yokdur. Zuhûr dahi ederse lede’l-hükkâmi’l-kirâm mesmû‘a olmaya dedikde mukırra-i mezbûrenin minvâl-i muharrer üzre cârî ve sâdır olan ikrârını mezbûr Ümmühâni Hâtun bi’l-asâle ve bi’l-vekâle tasdîk ve tahkīk etmeğin mâ hüve’l-vâki‘ ketb olundu. Fi’l-yevmi’r-râbi‘ ve’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: İbrahim Çelebi b. Mustafa, Mehmed Beşe b. Abdullah, İmirza Beşe b. Mehmed, es-Seyyid Mehmed Çelebi b. es-Seyyid Ahmed, Hüseyin Çelebi b. Ali ve gayruhüm mine’l-hâzırîn.