Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 96 Hüküm no: 63 Orijinal metin no: [13b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdülvehhâb’ın Şerif Mustafa Çelebi’nin evindeki ortak suyunu izinsiz kullanmaması Havâss-ı Aliyye kazâsı tevâbi‘inden kasaba-i Hasköy’de Kiremitçi Ahmed Çelebi mahallesi sâkinlerinden râfi‘ü’l-kitâb Mehmed b. Abdülvehhâb nâm çavuş meclis-i şerî‘at-ı şerîfede câr-ı mülâsıkı Emir Mustafa Çelebi b. Pîr Veli muvâcehesinde üzerine takrîr-i da‘vâ edip yine mahalle-i mezbûrede sâkine Timurhan bt. Abdullah sene ihdâ ve seb‘în ve elf Şevvâli’l-mükerremi’nin on beşinci günü silk-i mülk-i sahîhimde münselik olan emlâkinden, mahalle-i mezbûrede vâki‘ bir tarafdan Mehmed Çelebi ve bir tarafdan mezbûr Şerif Mustafa Çelebi mülkleri ve bir tarafdan David oğulları mülkleri ve bir tarafdan tarîk-i âm ile mahdûd iki sagīr oda ve tûlen on dokuz ve arzen sekiz zirâ‘ arsayı ve mezbûr Şerif Mustafa Çelebi ile müşterek bi’r-i mâî müştemil mülk menzilini cemî‘ tevâbi‘ ve levâhıkı ile tarafeynden îcâb ve kabûlü hâvî bey‘-i bâtt-ı sahîh-i şer‘î ile üç bin beş yüz fıddî nakd-i râyic fi’l-vakt akçeye bâtten bey‘ ve teslîm ve kabz-ı semen edip ben dahi ber minvâl-i muharrer iştirâ ve tesellüm ve kabz ve kabûl edip mülk-i müşterâm olmuş iken mezbûr Şerif Mustafa Çelebi zikr olunan bi’r-i mâî müştereken tasarrufuma mâni‘ olur, suâl olunup takrîri tahrîr olunmak matlûbumdur deyicek gıbbe’s-suâl mezbûr Şerif Mustafa Çelebi cevâbında fi’l-vâki‘ bâyi‘a-i merkūme Timurhan sâlifü’z-zikr bi’r-i mâda benim ile müşterek idiği mukarrerdir. Lâkin ol bi’r-i mâ benim haremimde olmağla her bâr müdde‘î-i mezbûr benim haremime dâhil olmasına râzı değilim deyû müdde‘î-i mezbûr Mehmed Bey’in mârrü’z-zikr bi’r-i mâda müşterek idiğini tav‘an ikrâr ve i‘tirâf etmeğin alâ mûceb-i ikrârihî mârrü’z-zikr bi’r-i mâdan hak almağa, min ba‘d mezbûr Mehmed Bey’e tâbi‘ olmak üzre merkūm Şerif Mustafa Çelebi’ye ve bilâ-izn mezbûrun haremine dâhil olmamak üzre mezbûr Mehmed Bey’e tenbîh-i şer‘î birle mâ cerâ bi’t-taleb ketb olundu. Fi’l-yevmi’s-sâmin aşer min şehri Recebi’l-ferd li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Receb Kethüdâ, Hüseyin Çelebi el-Muhzır ve Mehmed Muhzır ve gayruhüm mine’l-hâzırîn.