Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 97 Hüküm no: 64 Orijinal metin no: [13b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Beşe b. Hasan’ın menzilini Mehmed Usta b. Mahmud’a satması Havâss-ı Aliyye kazâsına tâbi‘ Terkos nâhiyesi a‘mâlinden Harâccı nâm karye sükkânından Mehmed Beşe b. Hasan nâm kimesne meclis-i şer‘de işbu râfi‘ü’l-kitâb fahrü’l-a‘yân Mehmed Usta b. Mahmud mahzarında ikrâr ve takrîr-i kelâm edip silk-i mülkümde münselik olan emlâkimden olup karye-i mezbûrede vâki‘ bir tarafdan Malkoç Ağazâde Ebûbekir Ağa mülkü ve bir tarafdan mîrî çayır ve bir tarafdan Ali Beşe b. Murad mülkü ve bir tarafdan tarîk-i âm ile mahdûd ve mümtâz olup iki bâb tahtânî odaları ve bir kıt‘a anbarı ve iki parça zât-ı eşcâr-ı müsmire ve gayrı müsmireyi müştemil bahçeyi ve bir güvercin kümesi ve bir kıt‘a bağı ve iki ahırı ve içinde olan tahmînen iki yüz kantar samanı ve bir kıt‘a harman yerini müştemil olup çiftlik ta‘bîr olunur mülk menzilimi ve içinde mevcûd olan üç çift kara sığır öküzünü ve iki re’s ineği ve bir danayı ve beş keyl buğdayı ve bir dolabı ve bir sandığı ve dört harman düveni ve bir arabayı ve yirmi beş re’s güvercin ve beş kovan ve beş tavuk ve bir balta burgu ve kebîr saban tağarı ve üç sığır saban demiri sâir tevâbi‘ ve levâhıkı ile hâlâ taht-ı tasarrufunda olan tarlalarda mezrû‘ olan hubûbâtdan arpa ve buğday ve yulafın cümlesini safka-i vâhide ile mezbûr Mehmed Ağa’ya elli bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm, ol dahi minvâl-i muharrer üzre iştirâ ve tesellüm ve kabz ve kabûl eyledikden sonra yine karye-i mezbûre toprağında vâki‘ çiftlik-i mezbûra intimâ ile tahdîd ve tavsîfden müstağnî olup merhûm ve mağfûrun-leh Sultan Mehmed Hân-ı Gāzi tâbe serâhu evkāfından olup taht-ı tasarrufunda olan iki kıt‘a tarlayı mütevellî-i vakf-ı mezbûr ma‘rifetiyle ve yine merhûm ve mağfûrun-leh Sultan Bayezid Hân-ı Velî evkāfı’ndan olup kendi tasarrufumda olan o beş kıt‘a tarlayı vakf-ı mezbûr mütevellîsi ma‘rifetiyle, yine taht-ı tasarrufumda olan iki kıt‘a çayırı dahi mütevellî-i vakf-ı mezbûr Sultan Bayezid ma‘rifetiyle altı bin akçe bedel mukābelesinde ferâğ ve tefvîz edip ol dahi minvâl-i meşrûh üzre tefevvüz ve kabûl eyleyip semen-i mezbûr elli bin akçe ile bedel-i mersûm altı bin akçe ki cem‘an elli altı bin akçeyi tamamen mezbûr Mehmed Usta yedinden alıp kabz eyledim ba‘de’l-yevm sâlifü’z-zikr çiftlik-i mezbûrda ve sâir eşyâda vechen mine’l-vücûh benim alâka ve medhalim yokdur. Müşterî-i mezbûrun mülk-i müşterâsı ve arâzi-i mersûm ile iki kıt‘a [14a] çayır dahi mezbûr Mehmed Usta’nın dâhil-i taht-ı tasarrufu olmuşdur. Emsâli gibi mutasarrıf olsun deyicek gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Recebi’l-ferd li sene isneteyn ve seb‘în ve elf. Şuhûdü’l-hâl: Ahmed Hâce b. Sinan el-İmâm-ı karye-i mezbûre, Sâlih Beşe b. Sinan, Hüseyin Çelebi b. Musa, Ahmed Beşe b. Musa, Mustafa Beşe b. İbrahim, Mehmed Kethüdâ, Şaban Ağa b. Hasan, el-Hâc Mahmud b. Halil, Hasan Beşe b. Ali, Abdi Efendi el-İmâm, el-Hâc Mehmed Çelebi b. Hasan, Mahmud Çelebi Dâmâd-ı mezbûr ve gayruhüm mine’l-hâzırîn.