Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 108 Hüküm no: 78 Orijinal metin no: [16b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ebûbekir Beşe b. Mehmed’in kölesi Şâhin b. Abdullah’ı âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Koca Kasımpaşa mahallesinde sâkin Ebûbekir Beşe b. Mehmed nâm kimesne meclis-i şer‘-i enver ve mahfil-i dîn-i münîr-i ezherde bi’t-tav‘ ve’r-rızâ lâ-bi’l-kerh ve’l-cezâ ikrâr-ı sahîh-i şer‘î ve i‘tirâf-ı sarîh-i mer‘î kılıp kendiye rıkk-ı sâbıkını mu‘terif olan işbu uzun boylu, açık kaşlı, sarı elâ gözlü Rûsiyyü’l-asl müslimiyyü’l-mille râfi‘ü’l-vesîka Şâhin b. Abdullah nâm abd-i memlûkümü hasbeten lillâhi te‘âlâ ve haseneten li rûhi resûlihi’l-mu‘allâ ve amelen bimâ kāle’n-nebiyyü’l-muhtâr -sallallâhu te‘âlâ aleyhi ve sellem- men a‘taka rakabeten mü’mineten a‘takallâhu te‘âlâ bi külli uzvin minhâ uzven minhu mine’n-nâr, abd-i mevsûf-ı mezkûru cümle malımdan ifrâz ve i‘tâk ve tahrîr ve zümre-i harâir-i asliyyîne ilhâk ve idrâc eyledim min ba‘d abd-i mevsûf-ı mezbûrun üzerinde hakk-ı velâdan gayrı hakkım bâkī kalmadı. Sâir ahrâr-ı asliyyîn gibi hür olsun dedikde hâkim-i muvakki‘-i sadr-ı kitâb hazretleri kıbelinden sıhhat-i ıtk-ı mezkûra hükm birle mâ vaka‘a bi’t-taleb ketb olundu. Fi’l-yevmi’r-râbi‘ min şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Çelebi b. Ahmed, Veli Beşe b. Mehmed, Osman Beşe b. Ahmed, Ali Çelebi b. Mehmed, Mehmed Beşe b. Mustafa, Halil Beşe b. Hüseyin ve gayruhüm mine’l-hâzırîn.