Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 126 Hüküm no: 101 Orijinal metin no: [22b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed Çelebi b. Kaytas’ın kardeşi Hacı Pîrî Bey’de alacağını tahsil edip hesaplaştığı Medîne-i Hazret-i Ebâ Eyyûb Ensârî -fî rıdvâni’l-Bârî-’de Câmi‘-i Kebîr mahallesi sükkânından Mehmed Çelebi b. Kaytas meclis-i şer‘de li ebeveyn karındaşı işbu râfi‘ü’l-kitâb el-Hâc Pîrî Bey b. Kaytas mahzarında ikrâr ve takrîr-i kelâm edip gāibetü ani’l-meclis ammetem ( ) nâm hâtun zimmetinde olan yirmi altı bin akçe hakkımı bundan akdem alıp kabz edip tedrîciyle alıp kendim ve ehl [ü] iyâlime infâk için meblağ-ı mezbûru karındaşım merkūm el-Hâc Pîrî’ye def‘ ve teslîm, ol dahi kabz ve tesellüm ve ilâ hâze’l-yevm bana meblağ-ı mezbûrdan beher yevm gâh yirmişer akçe ve gâh otuzar akçe def‘ ve teslîm edip ben dahi kabz ve tesellüm eyledim el-hâletü hâzihî ümmet-i Muhammed huzûrunda hesâb ve kitâb eylediğimizde meblağ-ı mezbûrun yirmi dört bin akçesi benim zimmetime geçip ancak karındaşım mezbûr el-Hâc Pîrî zimmetinde iki bin akçe hakkım kalmışdır anı dahi beher yevm kifâyet mikdârı alıp nefsime ve iyâlime infâk eyledim min ba‘d zikr olunan yirmi dört bin akçeye müte‘allik âmme-i de‘âvîden karındaşım mezbûr el-Hâc Pîrî’nin zimmetini ibrâ eyledim dedikde gıbbe’t-tasdîki’l-mu‘teber mâ hüve’l-vâki‘ bi’t-taleb ketb olundu. Fi’l-yevmi’l-hâdî ve’l-ışrîn li sene isneteyn ve seb‘în ve elf. Şuhûdü’l-hâl: Bağdâdî Ahmed Bey b. İslâm er-Râcil, Musli Çelebi b. Receb, Mehmed b. Abdullah, Mehmed Efendi b. Yusuf, Mehmed Çelebi b. Musli, Mehmed Beşe Çukadâr ve gayruhüm mine’l-hâzırîn.