Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 125 Hüküm no: 100 Orijinal metin no: [22b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Ebûbekir’e küfreden kapıcılardan Mehmed Bey’in kötü halinin tespiti Medîne-i Hazret-i Ebâ Eyyûb-i Ensârî -radiye anhu Rabbühü’l-Bârî-’de Sofular mahallesi sâkinlerinden Mustafa Çelebi b. Ebûbekir meclis-i şer‘de yine mahalle-i mezbûrede sâkin bevvâb-ı sultânî zümresinden Mehmed Bey b. Abdullah nâm kimesne mahzarında üzerine da‘vâ ve takrîr-i kelâm edip târih-i kitâbdan üç gün mukaddem ben kendi hâlimde mahalle-i mezbûrede menzilimin yanında dururken mezbûr Mehmed Bey sarhoş ve lâ-ya‘kıl bana bire anası falan ettiğim kahbenin oğlu bire yalan şâhidi deyû hâşâ cimâ‘ lafzıyla şetm ve ırzımı hedm eyledikden mâ‘adâ dâimâ sarhoş ve lâ-ya‘kıl gece bî-vakt zamânlarda gezip gece gündüz rast geldiği ümmet-i Muhammed’e nice türlü ezâ ve cefâ edip hedm-i ırz eder hâlâ suâl olunup ihkāk-ı hak olunmak matlûbumdur deyicek gıbbe’s-suâl mezbûr Mehmed Bey müdde‘î-i mezbûrun anasına cimâ‘ lafzıyla şetm eylediğini inkâr lâkin yalan şâhidi dedim deyû ikrâr etmeğin müdde‘î-i mezbûrdan merkūm Mehmed Bey hakkında takrîr eylediği makālin sıdkını mübeyyin beyyine taleb olundukda, udûl-i ricâlden Câmi‘-i Kebîr imâmı Mehmed Efendi b. İbrahim ve Zal Paşa imâmı Hasan Efendi ve Kiremitçi Süleyman imâmı Mustafa Efendi ve Sofular imâmı Ebûbekir Efendi ve Mehmed Efendi el-Kadı ve Abdurrahman b. Cafer ve Mehmed Çelebi b. Hüdâverdi ve Ebûbekir Dede el-Müezzin ve Mustafa Çelebi el-Müezzin ve Hüseyin Çelebi el-Müezzin ve Mustafa Çelebi b. Hüdâverdi ve diğer Mustafa Çelebi b. Pervâne ve sâir cemm-i gafîr ve cem‘-i kesîr meclis-i şer‘a li ecli’ş-şehâde hâzırûn olup isre’l-istişhâd fi’l-hakīka mezbûr Mehmed Bey tarîkü’s-salât ve şâribü’l-hamr dâimâ sarhoş ve lâ-ya‘kıl gece bî-vakt zamânlarda mahalle-i mezbûrede ve sâir yerlerde gezip rast geldiği müslümanlara şütûm-ı galîza ile şetm ve hedm-i ırz eylediği mukarrer ve muhakkakdır ve müdde‘î-i mezbûra dahi minvâl-i meşrûh üzre şetm eylediği vâki’dir deyû her biri mezbûr Mehmed Bey muvâcehesinde sû-i hâli alâ tarîki’ş-şehâde haber verdiklerinde vâki‘ü’l-hâl ketb olundu. Fi’l-yevmi’l-hâdî ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Bey b. Abdurrahman Efendi, Ahmed Bey el-Cündî, İslâm Bey b. Abdullah, Mahmud Beşe er-Râcil ve gayruhüm mine’l-hâzırîn.