Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 128 Hüküm no: 103 Orijinal metin no: [23a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ramazan b. Hüseyin’in arsasının Emine bt. Hacı Yusuf’a satılması ve tarlalarının kullanım hakkının devredilmesi Dârü’l-hilâfeti’l-aliyye Kostantıniyyet el-mahmiyye’de Şehremîni semtinde Ereğli mahallesinde sâkin iken bundan akdem vefât eden Ramazan b. Hüseyin nâm müteveffânın verâseti, zevce-i metrûkesi R[â]fia bt. Bayram hâtun ile sulbiye kebîre kızı Emine nâm hâtuna münhasıra olduğu şer‘an zâhir ve müte‘ayyin oldukdan sonra mezbûr Râfia asâleten ve mezbûr Emine tarafından bey‘-i âti’z-zikri ve kabz-ı semeni ikrâra vekîl olup mezbûrenin zâtını ma‘rifet-i şer‘le ârifân olan Derviş Bey b. Turgud ve İsmail b. Yusuf şehâdetleri ile şer‘an vekâleti sâbite olan zevci Zülfikar b. Abdullah nâm kimesne meclis-i şer‘de işbu sâhibetü’l-kitâb Emine bt. el-Hâc Yusuf mahzarında her biri bi’l-asâle ve bi’l-vekâle ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olup Havâss-ı Aliyye kazâsı a‘mâlinden Büyükçekmece nâhiyesine tâbi‘ Bojdar nâm karyede vâki‘ bir tarafdan İskarlet zimmî mülkü ve tarafeyni Üveys Ağa ahırı ve taraf-ı râbi‘i tarîk-i âm ile mahdûd müteveffâ-yı mezbûrdan bi’l-irsi’ş-şer‘î bize isâbet ve intikāl eden mülk-i mevrûs arsa-i hâliyemizi nakzı ve sâir tevâbi‘ ve levâhıkı ile ve yine karye-i mezbûre bağları dâhilinde lede’l-ahâlî ve’l-cîrân ma‘lûmetü’l-hudûd bir kıt‘a mülk harâbe bağ yerimizi ve yine bir tarafdan Üveys Ağa çayırı ve bir tarafdan İstoyani mülkü ve tarafeyni ( ) ile mahdûd bir kıt‘a mülk-i mevrûs bostanımızı ve bağ-ı merkūm kurbunda iki arabalık bir kıt‘a çayırımızı mezbûre Emine’ye üç bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bi safkatin vâhidetin bâtten bey‘ ve teslîm eylediğimizde ol dahi vech-i muharrer üzre iştirâ ve tesellüm ve kabz ve kabûl eyledikden sonra merhûm ve mağfûrun-leh Sultan Bayezid Hân-ı Velî -tâbe serâhu- evkāfı arâzisinden tefvîz-i âtî sudûruna değin zabt ve taht-ı tasarrufumda olup her birinin hudûdu inde’l-ahâlî ma‘lûme otuz sekiz keyl tohum istî‘âb eder on beş kıt‘a tarlalarımızın hakk-ı tasarruflarını evkāf-ı mezbûre mütevellîsi ma‘rifetiyle yedi bin fıddî nakd-i râyic fi’l-vakt akçe bedel mukābelesinde mezbûr Emine’ye tefvîz bi’l-ferâğ eylediğimizde ol dahi vech-i muharrer üzre tefevvüz ve kabûl edip semen-i mezbûr ile bedel-i merkūm cem‘an on bin akçeyi tamamen merkūme Emine yedinden alıp kabz eyledik ba‘de’l-yevm emlâk-i mezbûre merkūme Emine’nin mülk-i müşterâsıdır ve arâzi-i mersûme dahi dâhil-i taht-ı tasarrufu olmuşdur. Keyfe mâ yeşâ’ mutasarrıf olsun dediklerinde mâ vaka‘a [bi’t-taleb] ketb olundu. Fi’l-yevmi’l-hâdî ve’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: El-Hâc Mehmed b. Mustafa, Hasan Beşe b. Abdullah, Hüseyin Muhzır, Bayram Sofu, Perviz Kethüdâ b. Abdullah, Mehmed b. Mustafa ve gayruhüm mine’l-hâzırîn.