Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 129 Hüküm no: 104 Orijinal metin no: [23b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kasım Beşe b. Hasan’ın meyve bahçesini Ali Beşe b. Osman’a satması Vilâyet-i Rumeli’nde Ohri sancağına tâbi‘ İstarova kazâsına tâbi‘ Trebene nâm karyede sâkin Kasım Beşe b. Hasan meclis-i şer‘de işbu râfi‘ü’l-kitâb Ali Beşe b. Osman mahzarında bi tav‘ihî ikrâr ve i‘tirâf edip bey‘-i câ’i’z-zikrin sudûruna değin silk-i mülk-i sahîhimde münselik olan emlâkimden karye-i mezbûrede vâki‘ bir tarafdan Ali Beşe nâm kimesne mülkü ve bir tarafdan Kiga nâm zimmî bostanı ve tarafeyni tarîk-i âm ile mahdûd olup tahmînen bir dönüm bir kıt‘a mülk bostan yerimi ve etrâfında vâki‘ dört dib kara dut eşcârıyla bir dib asma ve bir dib ayva ve üç dib erik eşcârlarımı cümle tevâbi‘ ve levâhıkı ile müşterî-i mezbûr Ali Beşe’ye dokuz yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı kat‘î ile bâtten bey‘ edip ol dahi minvâl-i muharrer üzre iştirâ ve kabûl eyleyip semeni olan meblağ-ı mezbûrü’n-na‘t dokuz yüz akçeyi müşterî-i mezbûr Ali Beşe yedinden tamamen alıp kabz eylediğimden sonra sâlifü’z-zikr bir kıt‘a bostan yerini mahallinde zabt ve tasarrufa tarafımdan mezbûr Ali Beşe’yi taslît eyledim ba‘dehû benim alâka ve medhalim yokdur, mezbûr Ali Beşe emsâli gibi keyfe mâ yeşâ’ mutasarrıf olsun dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Hüseyin Bey b. Mehmed, Ali Beşe b. Mehmed, Mehmed Beşe b. Ali, Ali Beşe b. Hüseyin, Ali Çelebi b. Murtaza, Süleyman Beşe b. Mustafa, Mehmed Beşe b. Hasan, Osman Beşe b. Ali, Hüseyin Çelebi b. Ali, Hüseyin Beşe b. Hasan ve gayruhüm mine’l-hâzırîn.