Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 168 Hüküm no: 156 Orijinal metin no: [34a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rodine bt. Akandilo’nun evini Fitoni bt. Angilaki’ye satması Havâss-ı Aliyye kazâsına tâbi‘ Terkos nâhiyesi a‘mâlinden Bahçe Belgradı nâm karye sâkinlerinden Rodine bt. Akandilo nâm nasrâniye meclis-i şer‘-i şerîfede işbu râfi‘atü’l-vesîka Fitoni bt. Angilaki nâm nasrâniye muvâcehesinde ikrâr ve i‘tirâf edip bey‘-i câ’i’z-zikrin sudûruna değin silk-i mülk-i sahîhimde münselik olan emlâkimden olup karye-i mezbûrede vâki‘ bir tarafdan Vasil nâm zimmî mülkü ve bir tarafdan Yorgo mülkü ve ba‘zan Dimitri mülkü ve bir tarafdan Polihroni mülkü ve ba‘zan tarîk-i âm ile mahdûd bir bâb fevkānî ve bir bâb tahtânî odaları ve bir mikdâr havluyu müştemil mülk menzilimi cemî‘ tevâbi‘ ve levâhıkı ile mezbûr Fitoni’ye altı bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve teslîm edip ol dahi minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t altı bin akçeyi müşteriye-i merkūme Fitoni’den tamamen alıp kabz eyledim ba‘de’l-yevm menzil-i mahdûd-ı mezkûrda vechen mine’l-vücûh benim alâka ve medhalim yokdur, merkūme Fitoni’nin mülk-i müşterâsıdır, keyfe mâ yeşâ’ mutasarrıfe olsun dedikde mukırra-i merkūmenin minvâl-i meşrûh üzre cârî ve sâdır olan ikrârını mezbûre Fitoni vechen ve şifâhen tasdîk ve tahkīk etmeğin mâ hüve’l-vâki‘ kayd şüd. Fi’l-yevmi’s-sâlis aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Efendi b. Bostânî Efendi, Durmuş Çelebi b. Mehmed, Hamza Efendi nâib-i recül, Ali Beşe b. Mehmed nalband ve gayruhüm mine’l-hâzırîn.