Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 167 Hüküm no: 155 Orijinal metin no: [33b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fahrî Sultan’ın evinin bir kısmını âzat ettiği Rukiye’ye vermesi Husûs-ı âti’z-zikrin mahallinde tahrîri iltimâs olunmağın küttâb-ı mahkeme-i şerîfeden mevlânâ Sâlih Mehmed Efendi b. Mehmed irsâl olunup ol dahi zeyl-i vesîkada muharrerü’l-esâmî olan müslimîn ile medîne-i hazret-i Ebâ Eyyûb el-Ensârî -dâme fî rıdvâni’l-Bârî- ile Debbâğlar Deresi demekle ma‘rûf mahalde sâkine fahrü’l-muhadderât zevi’l-muvakkarât tâcü’l-mestûrât aliyyetü’z-zât safiyyetü’s-sıfât Ayşetü’d-dehr Fâtımatü’z-zamân Fahrî Sultan bt. el-merhûm el-mebrûr ed-darrâc ilâ medârici rahmeti Rabbihi’l-gafûr Sultan Murad Hân-ı atîk hazretlerinin sa‘âdet-hânelerine varıp akd-i meclis-i şer‘-i şerîf eylediğinde sultân-ı müşârün-ileyhâ hazretlerinin meclis-i ma‘kūd-ı mezkûrda mu‘takası olan sâhibetü’l-kitâb Rukiye bt. Abdullah nâm hâtun kıbelinden ikrâr-ı âti’z-zikri tasdîke vekîl olup nehc-i şer‘î ve tarîk-i mer‘î üzre şer‘an vekâleti sâbite olan kıdvetü’l-emâcid ve’l-ekârim câmi‘ü’l-mehâmid ve’l-mekârim Sultanzâde Süleyman Bey b. el-merhûm Davud Paşa mahzarında bi’t-tav‘ ve’r-rızâ ikrâr ve takrîr-i kelâm edip hibe-i âti’z-zikrin sudûruna değin silk-i mülk-i sahîhimde münselik ve semt-i zabt-ı tasarrufumda münharıt olup mahmiye-i İstanbul’da Şeyh Süleyman mahallesinde vâki‘ bir tarafdan Arabzâde mülkü ve ba‘zan ( ) ve bir tarafdan Nezir Kethüdâ mülkü ve bir tarafdan Fersa Hâtun mülkü ve bir taraf[dan] tarîk-i âm ve taraf-ı âharı kendi vakfım ile mahdûd olup mahmiye-i mezbûrede işbu def‘a vâki‘ olan harîk-i azîmede muhterik olan mülk ve sarayımın dâhiliyye ta‘bîr olunan mahallini bundan akdem ifrâz ve vakf-ı sahîh-i lâzım ile vakf ve haps etmişidim el-hâletü hâzihî sarây-ı mezkûrumun hâriciyye ıtlâk olunan mahallini dahi ba‘de’l-ifrâz ve nasbı alâmeti’l-fâsıla mu‘taka-i müvekkile-i mezbûre Rukiye’ye hibe-i sahîha-i şer‘iyye ile hibe ve temlîk ve teslîm eylediğimde ol dahi vech-i muharrer üzre meclis-i hibede ittihâb ve temellük ve tesellüm ve kabz ve kabûl eyledi ba‘de’l-yevm hudûd-ı mezkûr ile mahdûd olan mülk-i hâriciyye-i sarây mu‘takam müvekkile-i mezbûre Rukiyye’nin mülk-i mevhûbudur. Keyfe mâ yeşâ’ ve hasebe mâ yahtâr mutasarrıfe olsun deyû buyurduklarında gıbbe’t-tasdîki’l-mu‘teber vâki‘ hâli mevlânâ-yı mezbûr mahallinde tahrîr ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Fahrü’l-akrân Mustafa Ağa b. Ahmed Çorbacı, Reyhan Ağa b. İsmail Baş Ağa, Üveys Bey b. Mehmed Kethüdâ-yı teberdârân, Şaban Bey Ser-bölük, Hasan b. İsâ seroda-i teberdârân ve gayruhüm mine’l-hâzırîn.