Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 169 Hüküm no: 158 Orijinal metin no: [34a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Süleyman Efendi b. Mehmed’in ev satışından parasını Mehmed Çelebi b. Mehmed’in vârisinden alması Havâss-ı Aliyye kazâsı tevâbi‘inden kasaba-i Hasköy’de Sütlüce nâm mevzi‘de Mahmud Ağa mahallesi sâkinlerinden Süleyman Efendi b. Mehmed nâm kimesne meclis-i şer‘-i hatîr-i lâzımü’t-tevkīrde bundan akdem fevt olan Mehmed Çelebi b. Mehmed’in sulbî sagīr oğlu İbrahim’in kıbel-i şer‘den mansûb vasîsi olan Mehmed Efendi b. Mehmed mahzarında ikrâr ve takrîr-i kelâm edip bundan akdem silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Hüseyin Bey mülkü ve bir tarafdan Mehmed Çelebi mülkü ve bir tarafdan Kalyonîzâde merhûm vakfı olan menzil ve bir tarafdan tarîk-i âm ile mahdûd bir bâb tahtânî oda ve zât-ı eşcâr-ı müsmire ve gayrı müsmire bahçe ve kenîfi müştemil mülk menzilimi cemî‘ tevâbi‘ ve levâhıkı ve âmme-i menâfi‘ ve merâfıkı ile müteveffâ-yı mezbûra hâl-i hayâtında sekiz bin beş yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl eyledikden sonra semeni olan meblağ-ı mezbûrun altı bin akçesini yedinden alıp kabz edip mâ‘adâyı kable’l-istîfâ fevt eylemişdi el-hâletü hâzihî meblağ-ı bâkī iki bin beş yüz akçeyi vasiyy-i mezbûr Mehmed Efendi b. Mehmed yedinden tamamen alıp kabz edip menzil-i mezbûrda alâkam kalmadı ba‘de’l-yevm menzil-i mezbûr sagīr-i merkūmun mülk-i mahzı olmuşdur deyicek mukırr-ı mezbûr Süleyman Efendi’nin kelimât-ı meşrûhasını vasiyy-i mezbûr Mehmed Efendi ve mübâşir bi’l-muvâcehe tasdîk ve bi’l-müşâfehe tahkīk etmeğin mâ hüve’l-vâki‘ kayd şüd. Fi’l-yevmi gurreti şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Çelebi b. Ali el-Cündî, Hüseyin Çelebi b. Cafer el-Cündî, Hüseyin Çelebi b. Ali, Mehmed Çelebi Çukadâr ve gayruhüm mine’l-hâzırîn.