Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 170 Hüküm no: 159 Orijinal metin no: [34b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Artin v. Mosi adlı Ermeni’nin İbrahim b. Mustafa’da alacağı olması Ermeni tâifesinden işbu râfi‘ü’l-vesîka Artin v. Mosi nâm Ermeni meclis-i şer‘-i hatîr-i lâzımü’t-tevkīrde İbrahim Çelebi b. Mustafa nâm kimesne mahzarında üzerine takrîr ve da‘vâ edip beynimizde kadri ve vaz‘-ı ve kıymeti ilm-i şer‘î birle ma‘lûm yedimden müşterâ ve makbûz olup [esvâb] bahâsından mezbûr İbrahim Çelebi zimmetinde ba‘de külli hesâb on üç bin dört yüz akçe hakkım olup [taleb] eylediğimde edâdan imtinâ‘ eder suâl olunup alıverilmek murâdımdır deyicek gıbbe’s-suâl mezbûr İbrahim Çelebi cevâbında fi’l-vâki‘ müdde‘î-i mezbûr Artin yedinden müşterâ [ve] makbûz beynimizde kadri ve vaz‘-ı ve kıymeti ilm-i şer‘î birle ma‘lûm esvâb bahâsından ba‘de külli hesâb müdde‘î-i merkūma on üç bin dört yüz akçe lâzımü’l-edâ ve vâcibü’l-kazâ deynim vardır deyû bi tav‘ihî ikrâr ve i‘tirâf etmeğin ikrârı mûcebince meblağ-ı mezbûrü’n-na‘t on üç bin dört yüz akçeyi mezbûra edâ ve teslîm ile mezbûr İbrahim Çelebi ilzâm olunup mâ hüve’l-vâki‘ bi’t-taleb kayd şüd. Fi’l-yevmi’r-râbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Receb Bey b. Habib, Mehmed Çelebi b. Hasan, Mehmed Beşe b. Ahmed el-Yesârî, Hamza Efendi b. Ahmed, Dilâver Beşe b. Abdullah, Hüseyin Beşe b. Hasan ve gayruhüm mine’l-hâzırîn.