Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 171 Hüküm no: 161 Orijinal metin no: [34b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Safiye bt. Abdullah’ın Cafer Paşa Vakfı’na borçlu olup vakıf mütevellisini vekil tayini Medîne-i Hazret-i Ebâ Eyyûb -dâme fî rıdvâni’l-Bârî- Câmi‘-i Kebîr mahallesi sâkinelerinden Safiye bt. Abdullah nâm hâtun meclis-i şer‘de yine medîne-i mezbûrede vâki‘ merhûm Cafer Paşa vakfı’na bi’l-fi‘l mütevellî olan hâmilü’l-kitâb Mehmed Çelebi b. Ahmed nâm bevvâb-ı sultânî mahzarında ikrâr-ı tâmm ve takrîr-i kelâm edip sâbıkan vakf-ı mezbûra mütevellî olan Halil Çelebi’den bin altmış dokuz senesi şehri Rebî‘ulevveli’nde yirmi dört kıt‘a ve bin yetmiş senesi Şa‘bânı’nda dahi on kıt‘a ve sene-i mezbûre Şevvâli’nde dahi elli kıt‘a ki cem‘an seksen dört kıt‘a riyâlî guruş ve kırk akçe istirbâh ve kabz edip benim ve kızım mezbûre Ayşe’nin mütevellî-i merkūm yedinde rehn-i makbûzum var iken bundan akdem ben bir husûs için vilâyet-i Anadolu’da Kal‘a-i sultâniye’de zevcim yanına gidip hâlâ geldiğimde kızım mezbûre Ayşe merhûme olmuş ve mezbûr Halil Çelebi tevliyyetden azl olunmuş bulunup mütevellî-i lâhık mezbûr Mehmed Çelebi beni bâlâda zikr olunan mâl-ı vakfın asıl ve fürû‘unu ve kızım müteveffât-ı mezbûreden bende olan mâl-ı vakfın asıl ve fürû‘unu kable’l-edâ firâr eder deyû havf edip benden kefîl-i melî taleb etmekle ben dahi kendi deynim olan seksen dört guruş ve kızım müteveffât-ı mezbûre deyni olan kırk dört guruş ve kırk akçe ki cem‘an yüz yirmi sekiz kıt‘a tâmmü’l-vezn riyâlî guruş asl-ı mâl-ı vakf-ı mezbûru ve bâlâda zikr olunan [35a] sinîn ve şühûrdan beri müctemi‘ ilzâm-ı ribh-i şer‘î olunan cem‘an üç bin akçeyi edâ ve teslîm etmezden mukaddem firâr ve gaybet edersem yedinde olan rihânımı sûk-ı sultânîde semen-i misli ile bey‘ ve semeninden deynim olan meblağ-ı mezbûru asıl ve fürû‘uyla alıp vakf için kabz edip bâkī kalırsa bana teslîme azl ve in‘izâlden masûne vekâlet-i devriyye ile mezbûr mütevellî Mehmed Çelebi’yi tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve merâsimini edâya müte‘ahhid olmağın mâ hüve’l-vâki‘ kayd şüd. Fi’l-yevmi’l-hâmis aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mustafa Çelebi b. Hüdâverdi, Halil Çelebi mütevellî-i sâbık, Mehmed b. Mahmud, Hamza Efendi nâib-i recül, Mustafa Çelebi b. Pervâne ve gayruhüm mine’l-hâzırîn.