Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 170 Hüküm no: 160 Orijinal metin no: [34b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hüseyin b. Yasin’in evini Hacı Osman b. Mahmud’a satması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî- de Serv[i] mahallesi sâkinlerinden fahrü’l-emâsil ve’l-akrân Hüseyin b. Yasin nâm kimesne mahzarında meclis-i şer‘de işbu sıhhat-nisâbın sâhibi mefhar-i züvvârü’l-Haremeyni’ş-şerîfeyn es-sâ‘î beyne’s-Safâ ve’l-Merveteyn el-Hâc Osman b. Mahmud nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimden mahalle-i mezbûrede vâki‘ bir tarafdan Aydın b. Abdullah mülkü ve bir tarafdan çörekî Mustafa mülkü ve tarafeyni tarîk-i âm ile mahdûd bir bâb fevkānî ve bir bâb tahtânî odaları ve fevkānî ve tahtânî iki sofa ve dört su kuyusunu ve hadîka-i zât-ı eşcâr-ı müsmire ve gayrı müsmireyi ve kenîfi müştemil mülk menzilimi bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık beş yüz elli kıt‘a riyâlî guruş-ı kebîre müşârün-ileyh el-Hâc Osman Ağa’ya tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t beş yüz elli kıt‘a riyâlî guruşu tamamen müşterî-i merkūm el-Hâc Osman Ağa yedinden alıp kabz edip menzil-i mahdûd-ı mezkûrda vechen mine’l-vücûh alâkam kalmadı müşterî-i mezkûrun mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’ş-şer‘iyyi’l-vicâhiyyi’l-mu‘teber mâ hüve’l-vâki‘ kayd şüd. Fi’l-yevmi’l-hâmis aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Hamza Efendi nâib-i recül, Derviş b. Yusuf, el-Hâc Abdullah b. Yusuf, Hüseyin Çelebi nâzır, Mehmed Çelebi Çukadâr ve gayruhüm mine’l-hâzırîn.