Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 173 Hüküm no: 163 Orijinal metin no: [35a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dimitri v. Yorgi’nin ev ve arsasını Gelibolulu Dimitri’ye satması Mahrûse-i Galata’ya tâbi‘ Beyoğlu demekle ma‘rûf mahalde sâkine Dimitri v. Yorgi nâm zimmî meclis-i şer‘-i şerîfde işbu hâmilü’s-sifr Gelibolulu diğer Dimitri v. ( ) nâm zimmî tarafından ikrâr-ı âti’l-beyânı tasdîke vekîl olan Toma v. Yorgi nâm zimmî vekîl muvâcehesinde ikrâr ve takrîr-i kelâm edip Hâslar kazâsına tâbi‘ nefs-i Midye kasabasında vâki‘ bir tarafdan Karaca nâm zimmî mülkü ve iki tarafdan vâdi ve Sefer Çelebi mülkü ve bir tarafdan tarîk-i âm ile mahdûd bir bâb tahtânî ve bir bâb fevkānî oda ve cüneyne-i zât-ı eşcâr-ı müsmire ve gayrı müsmireyi müştemil mülk menzilimi bi cümleti’t-tevâbi‘ ve’l-levâhık mersûm diğer Dimitri’ye bin iki yüz fıddî nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i şer‘î ile bâtten bey‘ ve teslîm edip ol dahi vech-i muharrer üzre iştirâ ve tesellüm ve kabz ve kabûl eyledikden sonra yine menzil-i mahdûd-ı mezkûr kurbunda vâki‘ merhûm ve mağfûr Sultan Selim Hân evkāfı arâzisinden olup bakla ve sâir hadravât garsiyçün mevzû‘a tahmînen bir dönüm arsa-i hâliyemi evkāf-ı mezbûr mütevellîsi ma‘rifetiyle üç yüz akçe bedel mukābelesinde tefvîz bi’l-ferâğ eylediğimde ol dahi vech-i muharrer üzre tefevvüz ve kabûl edip semen-i mezbûr ile bedel-i merkūm ki cem‘an iki bin beş yüz akçeyi tamamen müşterî-i mersûm diğer Dimitri yedinden alıp kabz eyledim ba‘de’l-yevm menzil-i mezbûr merkūm diğer Dimitri’nin mülk-i müşterâsı ve ol arsa dahi dâhil-i taht-ı tasarrufu olmuşdur, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber mâ hüve’l-vâki‘ kayd şüd. Fi’l-yevmi’l-hâmis aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Mehmed Beşe b. Mahmud, Ahmed Efendi el-Kassâm, Eyüb Çelebi el-Mukayyid, Bayram Sofu b. Mehmed, Sâlih Mehmed Efendi b. Ali ve gayruhüm mine’l-hâzırîn.