Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 178 Hüküm no: 171 Orijinal metin no: [36b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Kaçak köleye nafaka tayini Mahmiye-i İstanbul hısnı ebvâbından Edirnekapısı hâricinde vâki‘ Küçük Hâslar’da hâlâ za‘îmü’l-vakt olan Mehmed Beşe b. Mustafa Beşe nâm râcil meclis-i şer‘-i şerîfde uzun boylu kerteles burunlu açık kaşlı elâ gözlü sarı bıyıklı Rûsiyyü’l-asl Yuvan v. ( ) nâm abd-i âbıkı ihzâr ve muvâcehesinde takrîr-i kelâm edip işbu gulâm-ı mevsûf-ı mezkûru ayağında olan demir rık ve âbık olmak üzre ahz ve ihzâr-ı şer‘ eylemişdir hâlâ suâl olunup sâhibi zuhûr edinceye kadar ma‘rûf nafaka farz ve takdîm olunmak matlûbumdur deyicek isre’l-istintâk merkūm Yuvan rık ve ibâkını mu‘terif olmağın hâkim-i muvakki‘-i sadr-ı kitâb hazretleri dahi âbık-ı merkūmun nafaka ve sâir havâic-i zarûriyyesi için beher yevm onar akçe nafaka farz ve takdîr ve inde’z-zarûre istidâne ve sâhibi zuhûr ettikde rücû‘a zâbit-i merkūma izin birle mâ hüve’l-vâki‘ kayd şüd. Fi’l-yevmi’s-sâbi‘ min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Ali Beşe er-Râcil, Hüseyin Çelebi b. Ali, Dilâver b. Abdullah, Hamza Efendi nâib-i recül ve gayruhüm mine’l-hâzırîn.