Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 178 Hüküm no: 170 Orijinal metin no: [36b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Beşe b. Mehmed’in, boşamış olduğu karısına mehrini ödemesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nişancı Paşa mahallesi sâkinelerinden bâ‘isetü’l-kitâb Sâkine bt. Mehmed nâm hâtun meclis-i şer‘de zevc-i mutallıkı Mustafa Beşe b. Mehmed nâm recül mahzarında üzerine takrîr-i da‘vâ edip zevcim mezbûr Mustafa Beşe beni tatlîk etmeğin mütekarrir olan iki bin akçe mehr-i müeccelimin ve nafaka-i iddet-i mu‘ayyene ve me’ûnet-i süknâmın alıverilmesi matlûbumdur deyicek gıbbe’s-suâl mezbûr Mustafa Beşe [cevâbında] fi’l-hakīka mezbûre Sâkine’yi tatlîk eyledim zimmetimde iki bin akçe mehr-i müeccel ve nafaka-i iddet ve me’ûnet-i süknâsı bâkīdir deyû bi tav‘ihî ikrâr ve i‘tirâf etmeğin ikrârı mûcebince mehr-i müecceli iki bin akçeyi nafaka-i iddet ve me’ûnet-i süknâsı için dahi beş yüz akçe cem‘an iki bin beş yüz akçeyi zevcesi mezbûre Sâkine’ye edâ ve teslîm ile mezbûr Mustafa Beşe ilzâm olunup mâ hüve’l-vâki‘ kayd şüd. Fi’s-sânî aşer min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Receb Bey b. Maden Kethüdâ, Dilâver b. Abdullah, Hüseyin b. Tayyib ve gayruhüm mine’l-hâzırîn.