Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 194 Hüküm no: 193 Orijinal metin no: [41a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Halo v. Kosta ve ortaklarının meyhanelerini Niko v. Toçko’ya satması Vilâyet-i Rumeli’nde Premedi kazâsına tâbi‘ Postana nâm karye zimmîlerinden Halo v. Kosta ve Niko v. Mano nâm zimmîler ve Ergiri kazâsı a‘mâlinden Senaymotlu? nâm karyeden diğer Niko v. Yorgo nâm zimmî meclis-i şer‘de işbu bâ‘isü’s-sifr Niko v. Toçko nâm zimmî muvâcehesinde her biri ikrâr ve takrîr-i kelâm edip akd-i âti’z-zikrin sudûruna değin silk-i mülk-i sahîhimde münselik olan emlâkimizden mahmiye-i İstanbul hısnı ebvâbından Yenikapı hâricinde Taşlık nâm mahalde vâki‘ bir tarafdan tarîk-i âm ve iki tarafdan Bektaş Ağa merhûm ocağı ile mahdûd ale’l-iştirâki’s-seviy mülkümüz olan bâb mülk meyhânemizi, cemî‘ tevâbi‘ ve levâhıkıyla ve içinde mevcûd iki kapaklı tencere ve iki tava ve iki şiş ve iki aded ocak demirini merkūm Niko’ya beş bin yedi yüz elli fıddî nakd-i râyic fi’l-vakt akçeye bi safkatin vâhidetin bâtten bey‘ ve teslîm eylediğimizde ol dahi vech-i muharrer üzre iştirâ ve tesellüm ve kabz ve kabûl eylediğimizden sonra semeni olan mezbûrü’n-na‘t beş bin yedi yüz akçeyi tamamen müşterî-i mezbûr Niko yedinden alıp kabz edip meyhâne-i mezkûrda alâka ve medhalim[iz] kalmadı. Min ba‘d müşterî-i merkūmun mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dediklerinde gıbbe’t-tasdîki’l-mu‘teber mâ hüve’l-vâki‘ bi’l-ibtigā sebt olundu. Fi’l-yevmi’s-sâbi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Ali Beşe Çukadâr, Hüseyin Muhzır, Dilâver Muhzır, Mehmed Muhzır ve gayruhüm mine’l-hâzırîn.