Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 193 Hüküm no: 192 Orijinal metin no: [40b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden müderris Ali Efendi’nin vârisinin Mehmed Çelebi b. Sun‘ullah olduğu Vilâyet-i Anadolu’da vâki‘ Gedegara kazâsına tâbi‘ Ceranlı nâm karye sâkinlerinden Mehmed Çelebi b. Sunullah tarafından muhallefât-ı câ’i’z-zikri taleb ve da‘vâya ve ahz ve kabz ve kendiye îsâle ve kabz ve îsâl mütevakkıf olduğu umûrun küllîsine vekîl olup vekâleti isimleri âtî şuhûd-ı tarîk şehâdetleriyle şer‘an sâbite olan Şaban b. Receb nâm kimesne yedinden kazâ-i mezbûrede bi’l-fi‘l kadı olan mevlânâ Mahmud Efendi b. Mehmed imzâsıyla mümzâ ve hatmiyle mahtûm işbu târih-i kitâb senesi Şa‘bânü’l-mu‘azzamı evâhiri ile müverrah nakl-i şer‘î vârid olup mazmûnunda udûl-i müslimînden Mehmed b. Mustafa ve Halil b. Hacı Mustafa nâm kimesneler müvekkil-i mezbûrdan tarîka-i mer‘iyye üzre da‘vâ-yı sahîha-i şer‘iyye ve istişhâd-ı mer‘î sudûrundan sonra nakl ve tahvîl için mahall-i cerh ve ta‘dîle li ecli’ş-şehâde hâzırân olup isre’l-istişhâd Hazret-i Eyyûb’da vefât edip muhallefât anda alâ tarîki’l-emâne mazbûta ve makbûza olan Ali Efendi b. Hızır Fakīh b. İlyas Fakīh nâm kimesnenin müdde‘î-i mezbûr Mehmed Çelebi’nin babası Sunullah b. Yakub b. İlyas Fakīh’dir, mezbûr Hızır ile merkūm Yakub İlyas Fakīh’in oğullarıdır, müteveffâ-yı mezbûr Ali Efendi’nin verâseti bi tarîki’l-usûbeti’n-nesebiyye müdde‘î-i mezbûr Mehmed Çelebi’ye münhasıra olmağla gayrı vâris ve terekesine müstahık kimesne bilmeziz biz bu husûsa şâhidleriz, şehâdet dahi ederiz deyû edâ-i şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olup mezbûr Şaban’ı ber minvâl-i muharrer tarafından vekîl olup ol dahi vekâleti kabûl eylediğini mevlânâ-yı mezbûr inhâ etmeğin müteveffâ-yı mezbûrun muhallefâtına vaz‘-ı yedi ikrâr ile sâbit olup medîne-i mezbûrda Defterdâr Mahmud Efendi mahallesinde sâkin olan Karakaş Ali Ağa b. İbrahim tarafından Süleyman Beşe b. İsâ ve Mehmed b. Abdullah şehâdetleri ile şer‘an vekâleti sâbite olan Şâhin Bey b. Abdullah nâm vekîl mahfil-i kazâya ihzâr ve nakl-i mezkûr mahzarında feth ve kırâat olundukda, vekîl-i mezbûr müvekkil-i merkūmun müteveffâ-yı mezbûr Ali Efendi’nin muhallefâtını ber mûceb-i defter-i kassâm vaz‘-ı yedini bi’l-vekâle ikrâr, lâkin nakl-i merkūmun vürûdunu münkir olıcak, vekîl-i mezbûrdan nakl-i merkūmun mevlânâ-yı müşârün-ileyhden vürûdunu mübeyyine beyyine taleb olundukda, zeyl-i nakl-i mezkûrda isimleri mezkûr olan şuhûd tarafından Yazıcı Şaban Bey b. Hacı Musa ve diğer Şaban Bey b. eskici Habib mahfil-i kazâya li ecli’ş-şehâde hâzırân olup isre’l-istişhâd fi’l-hakīka kitâb-ı mezbûr kasaba-i merkūmede bi’l-fi‘l kadı olan mûmâ-ileyh Mahmud Efendi’nin kitâbıdır hat ve hatmi mevlânâ-yı mûmâ-ileyhindir, kitâb-ı mezbûr bizim huzûrumuzda sâbit olmuşdur. Biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle ba‘de’l-hükm mâ hüve’l-vâki‘ kayd şüd. Fi’l-yevmi’s-sâmin ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Receb Bey Kethüdâ, Hamza Efendi Nâib-i recül, Eyüb Çelebi el-Mukayyid ve’l-Müsta‘id, Dilâver Bey Ser-bölük, Mehmed b. Mahmud ve gayruhüm mine’l-hâzırîn.