Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 196 Hüküm no: 195 Orijinal metin no: [41b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mosi v. İsak’ın ev hissesini Yahuda v. Belhıya’ya satması Havâss-ı Refî‘a kazâsına tâbi‘ kasaba-i Hasköy’de Kiremitçi Ahmed Çelebi mahallesi sükkânından olup Portakal cemâ‘atinden Mosi v. İsak nâm yahudi meclis-i şer‘-i hatîr-i lâzımü’t-tevkīrde işbu râfi‘ü’s-sifr Yahuda v. Belhıya nâm yahudi muvâcehesinde bi tav‘ihî ikrâr ve takrîr-i kelâm edip akd-i âti’z-zikrin sudûruna değin ale’l-iştirâki’s-seviy silk-i mülk-i sahîhimde münselik olan emlâkimden mahalle-i mezbûrda vâki‘ bir tarafdan Abraham v. David mülkü ve bir tarafdan Odabaşı Hasan Çelebi mülkü ve bir tarafdan Defterdârzâde Mahmud Çelebi bostanı ve taraf-ı râbi‘i tarîk-i âm ile mahdûd olup iki bâb fevkānî oda ve tahta-pûş ve iki bâb tahtânî oda ve bir su kuyusunu ve zât-ı eşcâr-ı müsmire ve gayrı müsmire bahçeyi müştemil mülk menzilin bundan akdem nısfı benim ve nısf-ı âharı mezbûr Yahoda’nın mülkü olup el-hâletü hâzihî menzil-i mahdûd-ı mezkûrda olan nısf hisse-i şâyi‘amı, cümle tevâbi‘ ve levâhıkı ile merkūm Yahuda’ya kırk beş bin nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile bey‘ ve teslîm edip minvâl-i muharrer üzre iştirâ ve tesellüm ve kabz ve kabûl eyleyip semeni olan mezbûrü’n-na‘t kırk beş bin akçeyi mezbûr Yahuda yedinden tamamen alıp kabz eyledim ba‘de’l-yevm menzil-i mahdûd-ı mezkûrun mecmû‘u mezbûr Yahuda’nın mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun deyicek gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’r-râbi‘ Şevvâli’l-mükerrem li sene isneteyn ve seb‘în ve elf. Şuhûdü’l-hâl: Musli Bey b. Abdullah, Hüseyin Beşe b. Hasan, Bayram Sofu b. ( ) Muhzır, Mehmed Çelebi Çukadâr ve gayruhüm mine’l-hâzırîn.