Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 197 Hüküm no: 196 Orijinal metin no: [41b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Müderris Ali Efendi’den kalan mirasın Ali Ağa tarafından vârisine tam olarak teslim edildiği Husûs-ı âti’l-beyânın mahallinde tahrîr[i] iltimâs olunmağın küttâb-ı mahkeme-i şerîfeden mevlânâ Sâlih Mehmed Efendi b. Mehmed irsâl olunup ol dahi zeyl-i kitâbda muharrerü’l-esâmî olan müslimîn[den] medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Defterdâr Mahmud Efendi [mahallesi] sâkinlerinden umdetü’l-emâcid ve’l-ekârim câmi‘ü’l-mehâmid ve’l-mekârim Karakaş Ali Ağa b. İbrahim’in menziline varıp akd-i meclis-i şer‘-i şerîf eylediğinde mûmâ-ileyh Ali Ağa’nın menzilinde mütemekkin iken bundan akdem vefât eden Ali Efendi b. Hızır nâm müderrisin min ciheti’l-usûbeti’n-nesebiyye bi’l-inhisâr vârisi olup verâseti, vilâyet-i Anadolu’da Gedegara kadısı Mahmud Efendi huzûr[unda] isbât olunup nakl-i şer‘î ile inhâ olunan Mehmed Çelebi b. Sunullah tarafından müteveffâ-yı mezbûrun muhallefâtını vâzı‘ü’l-yed olanlardan taleb ve ahz ve kendiye îsâle ve inde’l-hâce lede’l-hükkâmi’l-kirâm mürâfa‘a ve muhâsamaya vekîl olup vekâleti yedinde olan nakl-i şer‘î mûcebince sâbite olan Şaban b. Receb nâm vekîl meclis-i ma‘kūd-ı mezkûrda, râfi‘ü’l-kitâb müşârün-ileyh Ali Ağa mahzarında üzerine takrîr-i da‘vâ edip müvekkilim mezbûr Mehmed Çelebi’nin mûrisi müteveffâ-yı mezbûr Ali Efendi mûmâ-ileyh Ali Ağa’nın menzilinde fevt olmağla mecmû‘-ı muhallefâtına vaz‘-ı yed etmeğin ben dahi yedimde olan nakl-i şer‘î mûcebince müvekkilim mezbûrun verâsetini meclis-i şer‘de müşârün-ileyh Ali Ağa’nın vekîli mahzarında isbât edip vaz‘-ı yed eylediği muhallefâtı ber mûceb-i defter bi’l-vekâle taleb eylediğimde isimleri nâ-ma‘lûm kırk iki cild kitâb ve bir sepet evrâk-ı perişân ve bir köhne kimonî ferâce ve bir köhne darçınî çukaya kaplı kürk ve bir köhne pîştahta ve nısf destâr ve sincab kaplı bir mintan kürk ve bir köhne mor sof ve bir tülbent börkü bana teslîm edip mâ‘adâsını ketm ile cevâb vermişdir el-hâletü hâzihî müşârün-ileyh Ali Ağa ve hizmetkârları Mehmed b. Abdullah ve Süleyman b. İsâ ve Şâhin b. İsâ ve Sefer b. Abdullah nâm kimesneler muhallefât-ı müteveffâ-yı mezbûrdan bâlâda tahrîr olunan eşyâdan gayrı nukūd-ı menkūl ve siyâb ve sâir ism-i mâl ıtlâk olunur kalîl ve kebîr bir nesne şey almadıklarına ve aldırmadıklarına ve ilimleri olmadığına istihlâf[en] müşârün-ileyh Ali Ağa ve mezkûrûn kimesneler ale’l-infirâd yemîn billâhi te‘âlâ eylediklerinde vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin vekîl-i mezbûr bî-vech ta‘arruzdan men‘ birle mâ hüve’l-vâki‘ kayd şüd. Fi’l-yevmi’t-tâsi‘ ve’l-ışrîn min şehri Ramazâni’l-mübârek li sene isneteyn ve seb‘în ve elf. Şuhûdü’l-hâl: Fahrü’l-müderrisîn Şaban Efendi b. Hüseyin, Hüseyin Bey el-Cündî, Dilâver b. Abdullah el-Muhzır, Ali Beşe Çukadâr ve gayruhüm mine’l-hâzırîn.