Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 224 Hüküm no: 226 Orijinal metin no: [49a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Emânî Çelebi Vakfı’nın eski mütevelli kaymakamı Müezzin Mehmed Çelebi’nin vakfa olan borcunu ödemesi Mahmiye-i İstanbul hısnı ebvâbından Yenikapı hâricinde vâki‘ Emânî Çelebi merhûm evkāfına berât-ı pâdişâhî ile hâlâ-bi’l-fi‘l mütevellî olan râfi‘ü’l-kitâb Abdülaziz Çelebi b. Sinan meclis-i şer‘de sâbıkan evkāf-ı mezbûreye mütevellî olup müteveccih-i hacc-ı şerîf olan Receb Çelebi b. Ali’nin kāimmakāmı olup mâl-ı vakf-ı mezbûra vaz‘-ı yedi ikrârıyla sâbit olan Müezzin Mehmed Çelebi mahzarında üzerine takrîr-i da‘vâ edip kāimmakām-ı mezbûr Mehmed Çelebi mâl-ı vakf-ı mezbûrun asıl ve fer‘inden bir mikdârını itlâf etmekle tevliyyet-i mezbûreden azl ve berât-ı pâdişâhî ile bana tevcîh olunmağın evkāf-ı mezbûre nâzırı olan hâkim-i muvakki‘-i sadr-ı kitâb huzûrunda kāimmakām-ı mezbûrun muhâsebesi görüldüğünden zimmetine asl-ı mâl-ı vakf-ı mezbûrdan cem‘an kırk iki kıt‘a tâmmü’l-vezn riyâlî guruş ve kabz eylediği icârâtdan dahi yedi yüz altmış dört akçe zuhûr etmişdir el-hâletü hâzihî zikr olunan mâl-ı vakf-ı mezbûr vakf için matlûbumdur deyicek gıbbe’s-suâl kāimmakām-ı mezbûr mü’ezzin Mehmed Çelebi cevâbında fi’l-hakīka mâl-ı vakf-ı mezbûrdan mütevellî-i sâbık-ı merkūm Receb Çelebi’nin babası yedinden kāimmakām olduğum ecilden her biri yedişer dirhem gelir doksan altı buçuk kıt‘a riyâlî guruş asıl ve icârâtdan dahi dört bin yedi yüz on bir akçe alıp kabz eylemişdim el-hâletü hâzihî tevliyyet-i mezbûreden ben azl olunup müdde‘î-i merkūm Abdülaziz Çelebi mütevellî olmağla hâkim-i mûmâ-ileyh huzûrunda ber mûceb-i defter muhâsebem görüldüğünde asl-ı mâl-ı vakf-ı mezbûrdan yirmi yedi buçuk kıt‘a riyâlî guruş ve tebdîl için meclis-i şer‘de yedime verilen iki kıt‘a riyâlî guruş dahi ve bilâ-rehin ve lâ-kefîl mütevellî-i sâbıkdan istirbâh eylediğim on iki buçuk kıt‘a riyâlî guruş sekiz dirhem ki cem‘an kırk iki kıt‘a riyâlî guruş ve ihrâcâtımdan sonra makbûzum olan icârâtdan dahi yedi yüz altmış dört akçe zimmetimde zuhûr etmişdir deyû bi tav‘ihî i‘tirâf etmeğin ikrâr-ı mûcebince zikr olunan kırk iki guruş asl-ı mâl ve yedi yüz altmış dört akçe icârâtı vakf-ı mezbûr için mütevellî-i lâhık-ı müdde‘î-i mezbûr Abdülaziz Çelebi’ye edâ ve teslîm ile kāimmakām-ı mezbûr Müezzin Mehmed Çelebi ilzâm olunup mâ hüve’l-vâki‘ kayd şüd. Fi’l-yevmi’t-tâsi‘ aşer min şehri’l-mübârek [Şevvâli’l-mükerrem] li sene isneteyn ve seb‘în ve elf. Şuhûdü’l-hâl: Kâtib Mehmed Çelebi b. İsmail, Ali Halîfe İmâm-ı mahalle-i Sâlih Çelebi, Mehmed Çelebi İmâm-ı mahalle-i mezbûr, Hâce Hasan Cüzhân, Ali Beşe Çukadâr ve gayruhüm mine’l-hâzırîn.