Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 222 Hüküm no: 225 Orijinal metin no: [48b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bayezid Ağa mahallesinden Ayşe’nin Cafer Paşa Vakfı’ndan alacak davasının reddi Mahmiye-i İstanbul hısnı ebvâbından Topkapısı dâhilinde Bayezid Ağa mahallesi sâkinelerinden Ayşe bt. Mehmed nâm hâtun meclis-i şer‘de medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Merhûm Cafer Paşa evkāfına bi’l-fi‘l mütevellî olan bâ‘isü’l-kitâb Mehmed Çelebi b. Ahmed nâm kimesne mahzarında üzerine da‘vâ ve takrîr-i kelâm edip mahmiye-i İstanbul’da Koğacı Dede mahallesinde sâkine Râziye bt. Abdullah nâm sâhibetü’l-hayrın bin altmış iki senesi Zilka‘desinin yirmi sekizinci günü mahalle-i mezbûrede vâki‘ lede’l-ahâlî ve’l-cîrân ma‘lûmü’l-hudûd mülk menzilini vakf-ı lâzım ile vakf ve haps edip süknâsını kendiden sonra zevci Yusuf nâm kimesneye ba‘dehû sulbî oğulları Osman ve Şaban’a, ba‘dehû mezbûr Şaban evlâdına ve evlâd-ı evlâdına ba‘dehüm mu‘takı merhûm Cafer Paşa oğlu Cafer Bey’e ba‘dehû merhûm-ı mezbû[r] evkāfı mütevellîsi yediyle ve ecr-i misli ile îcâr olunup icâre merhûm-ı mezbûrun evkāfına zam olunmak şart ve ta‘yîn ve vakfiye-i ma‘mûlün-bihâsında tasdîk etmekle vâkıfe-i mezbûrenin oğlu mezbûr Şaban benim zevcim olup fevt olduğunda, menzil-i mezbûr ber mûceb-i şart-ı vâkıfe merkūm Şaban’ın firâşından hâsıl eylediğim oğlum Mehmed’e intikāl etmeğin ben ve kayın anam ve oğlum mezbûr Mehmed menzil-i mezbûrda sâkin olduğumuz ecilden ben kendi malımdan menzil-i mezbûrun meremmâta muhtâc olan ba‘zı mevâzi‘ine bin beş yüz akçe harc ve sarf etmiş iken oğlum mezbûr hâlâ fevt olup meşrûtün-lehüm olanlardan bir[i] dahi kalmamağla vakf-ı mezbûr mütevellîsi şart-ı vâkıfe üzre menzil-i mezbûru âhara îcâr ve icâresini evkāf-ı mezbûreye zam edip ...? harc ü sarf eylediğim mârrü’z-zikr bin beş yüz akçeyi taleb eylediğimde teslîmden imtinâ‘ eder hâlâ suâl olunup alıverilmek matlûbumdur deyicek gıbbe’s-suâl mütevellî-i mezbûr cevâbında fi’l-hakīka vâkıfe-i mezbûre menzil-i mahdûd-ı mezkûru ber minvâl-i muharrer vakf-ı lâzım ile vakf ve şart edip merkūm Mehmed fevt olup meşrûtün-lehüm olanlar dahi münkariz olmağla ber mûceb-i şart-ı vâkıf menzil-i mezbûru âhara îcâr ve icâresini evkāf-ı mezbûra zam eylediğim mukarrer ve muhakkakdır lâkin müdde‘iye-i mezbûre menzil-i vakf-ı mezbûrun muhtâc-ı ta‘mîr olan mevâzi‘ine ol mikdâr akçe sarf eylediği ma‘lûmum değildir eylediği takdîrce izn-i hâkim ve izn-i mütevellî olmamışdır vakfa teberru‘dur deyicek isre’l-istintâk müdde‘iye-i mezbûre fi’l-hakīka cevâbında eyledüğüm bin beş yüz [akçe] meremmâtı izn-i hâkim ve izn-i mütevellî ile eylememişimdir deyû bi tav‘ihâ ikrâr ve i‘tirâf etmeğin bi hasebi’ş-şer‘i’ş-şerîf [bilâ] izn-i hâkim ve [bilâ]-izn-i mütevellî ile sarf olunan meblağ-ı mezbûr vakfa teberru‘ olmağın mezbûre Ayşe bî-vech ta‘arruzdan men‘ birle mâ hüve’l-vâki‘ bi’t-taleb ketb olundu. Tahrîren fi’l-yevmi’t-tâsi‘ min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mustafa Çelebi b. Rıdvan, Ali Beşe b. Emrullah, Hüseyin Beşe b. Mehmed, Sâlih Efendi b. Mehmed ve gayruhüm mine’l-hâzırîn.