Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 225 Hüküm no: 228 Orijinal metin no: [49a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Hüseyin ile Sâlih Çelebi b. Mehmed’in geçimsizlik sebebiyle muhâlaa yoluyla boşanması Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Davud Ağa mahallesi sâkinelerinden Fâtıma bt. Hüseyin nâm hâtun meclis-i şer‘-i hatîr-i lâzımü’t-tevkīrde zevci işbu râfi‘ü’l-kitâbi’l-müstetâb Sâlih Çelebi b. Mehmed nâm kimesne mahzarında bi’t-tav‘ ve’r-rızâ ikrâr ve takrîr-i kelâm edip mezbûr Sâlih Çelebi zevcim olup lâkin hüsn-i zindegânemiz olmamağla beynimizde şikāk-ı küllî vâki‘ olmağın mezbûrun zimmetinde mütekarrir olan yüz kıt‘a riyâlî kebîr guruş mehr-i müeccel ve nafaka ve iddet ve me’ûnet-i süknâmdan fâriğa olduğumdan mâ‘adâ bundan akdem zevcim mezbûr Sâlih Çelebi zimmetinde cihet-i karz-ı şer‘îden olan altı bin üç yüz akçeyi dahi bedel-i hul‘ olmak üzre zevcim mezbûr Sâlih Çelebi ile muhâla‘a-i şer‘iyye ile muhâla‘a eyleyip mezbûrun zimmetini zevciyyete ve meblağ-ı mârrü’z-zikr altı bin akçeye müte‘allik cemî‘ de‘âvî ve mütâlebât ve eymân-ı muhâsamâtdan ibrâ ve iskāt eyledim ba‘dehû husûs-ı mezbûra müte‘allika da‘vâ ve nizâ‘ımız yokdur deyicek meclis-i mezbûrda merkūm Sâlih Çelebi dahi minvâl-i muharrer üzre olan hul‘-ı mezbûru kabûl ve mezbûre Fâtıma’nın zimmetini ben dahi [49b] zevciyyeteve gayr-ı hukūka müte‘allik olan da‘vânın küllîsinden ibrâ ve iskāt eyledim deyicek gıbbe’t-tasdîki’ş-şer‘î mâ hüve’l-vâki‘ bi’l-ibtigā sebt olundu. Fi’l-yevmi’l-hâmis aşer min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Mehmed Efendi b. İbrahim el-İmâm, Mustafa Efendi b. Mehmed el-İmâm, Derviş Çelebi b. Ali, Hüseyin Çelebi b. İsâ el-Müezzin, Mustafa Çelebi Sâ‘atî, Hüseyin Çelebi b. Mustafa, Şaban Çelebi b. Mustafa, Mustafa b. Mehmed, İbrahim Beşe b. Ebûbekir, Hüseyin Çelebi en-Nâzır, Kasım Beşe b. Halil ve gayruhüm mine’l-hâzırîn.