Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 226 Hüküm no: 229 Orijinal metin no: [49b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmail Bey b. İbrahim’in babasından intikal eden arazi davasında yeğeni Ahmed ile anlaştıkları Yâ Fettâh Husûs-ı âti’l-beyânın mahallinde tahrîr[i] iltimâs olunmağın küttâb-ı mahkemetü’l-bünyândan fahrü’l-müderrisîn mevlânâ Sâlih Mehmed Efendi b. Mehmed irsâl olunup ol dahi zeyl-i kitâbda muharrerü’l-[esâmî] olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî- hâricinde Topçular nâm mevzi‘de sâkin fahrü’l-emâsil ve’l-eşbâh Ahmed Bey’in sâkin olduğu menziline varılıp akd-i meclis-i şer‘-i şerîf olundukda, vilâyet-i Rumeli’nde cezîre-i Mora’da Halomiç kazâsına tâbi‘ Gastova nâm kasabada sâkin iken bundan akdem vefât eden İbrahim Ağa b. Şahbaz’ın sulbî kebîr oğlu kıdvetü’l-emâsil ve’l-e‘âzım İsmail Bey meclis-i ma‘kūd-ı mezkûrda, bundan akdem fevt olan li ebeveyn karındaşı Mehmed Bey’in sulbî kebîr oğlu mûmâ-ileyh Ahmed Bey mahzarında bi’t-tav‘i’s-sâf ikrâr-ı tâm ve takrîr-i kelâm edip bundan akdem fevt olan babam müteveffâ-yı mezbûr İbrahim Ağa’nın verâseti bana ve âhar sulbî kebîr oğlu birâderim merkūm Mehmed Bey’e münhasıra olup merkūm Mehmed Bey dahi fevt olmağın verâseti sulbî kebîr oğlu merkūm Ahmed Bey ve Cafer ve İbrahim Bey nâm mahdûmlara münhasıra olmağla babam müteveffâ-yı mezbûrdan zikr olunan Halomiç kazâsında vâki‘ çiftlikler ve tarlalar nısfiyyet üzre bana ve mezbûr Ahmed Bey’in babası birâderim müteveffâ-yı mezbûr Mehmed Bey’e intikāl-i âdî ile intikāl edip ba‘dehû birâderim merkūm Mehmed Bey dahi fevt olmağla ol çiftlikleri ve tarlalarda olan nısf hissesi oğulları mezbûrûn Mehmed Bey ve Cafer Bey ve İbrahim Bey’e intikāl-i âdî ile intikāl edip ba‘dehû mezbûrân İbrahim Bey ve Cafer Bey dahi müte‘âkiben fevt olup evlâd-ı zükûrları kalmamağla babaları müteveffâ-yı mezbûrdan intikāl eden arâziler müstahakk-ı tapu olmağla târih-i kitâbdan altı sene mukaddem zikr olunan arâziyi iki bin sekiz yüz kıt‘a riyâlî guruş resm-i tapu ile ashâb-ı arâziden tefevvüz ve yedime temessük alıp lâkin târih-i mezbûrdan bu âna gelince zikr olunan arâziyi birâderzâdem mezbûr Ahmed Bey zirâ‘at ve harâset ve zabt ve tasarruf eder. Lâkin hakk-ı tapu benimdir deyû zikr olunan arâziyi benden taleb ve da‘vâ eylediğinde ben dahi ashâb-ı arâziye verdiğim iki bin sekiz yüz guruşu ve altı sene fuzûlen zabt ve zirâ‘at eylediği arâzinin ber mûceb-i fetvâ-yı şerîf üç bin beş yüz otuz iki guruş noksân-ı arâzi ve beynimizde ma‘lûm çiftlikler mahsûlünden ba‘de’l-hesâb kabz eylediği bin yüz guruşu ve bundan akdem fevt olan Defterdâr Paşa birâderi Mehmed Ağa’ya birâderim merhûm-ı mezbûr ile kefîl olup âhardan alıverdiğimiz yirmi üç bin guruşdan birâderim merhûm-ı mezbûr hissesine düşen on bir bin beş yüz guruşdan emr ile edâ eylediğim meblağ-ı ma‘lûmü’l-mikdârı bana def‘ ve teslîm eyle ben dahi ol arâziden kasr-ı yed edip sana tefvîz ve teslîm edeyim deyû cevâb verdiğimde, beynimizde münâza‘ât-ı kesîre ve muhâsamât-ı adîde vâkı‘a olmuşidi el-hâletü hâzihî beynimizde muslihûn tavassut edip birâderzâdem mûmâ-ileyh Ahmed Bey ile da‘vâ-yı mezkûrumdan beni bin kıt‘a riyâlî guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan mezbûrü’n-na‘t bin kıt‘a riyâlî guruşu tamamen birâderzâdem mûmâ-ileyh Ahmed Bey yedinden alıp kabz [edip] birâderleri merhûmân-ı mezbûrân Cafer Bey ve İbrahim Bey mahlûllerinden tefevvüz eylediğim arâziyi birâderzâdem mûmâ-ileyh Ahmed Bey’e ashâb-ı arâzi ma‘rifetiyle tefvîz bi’l-ferâğ eylediğimde ol dahi tefevvüz ve kabûl etmeğin mahallinde zabt ve tasarrufa tarafımdan müşârün-ileyh Ahmed Bey’i taslît edip bâlâda zikr olunan husûslara müte‘allik âmme-i da‘vâ ve mütâlebât ve eymân ve muhâsamâtdan mûmâ-ileyh Ahmed Bey’in zimmetini ibrâ-i âmm-ı kātı‘ü’n-nizâ‘la ibrâ ve iskāt-ı tâmm-ı râfi‘ü’l-hisâm birle iskāt eyledim ba‘de’l-yevm merhûmân-ı mezbûrân mahlûllerinden tefvîz eylediğim arâzide benim alâkam yokdur, birâderzâdem müşârün-ileyh Ahmed Bey’in dâhil-i havza-i tasarrufu olmuşdur, emsâli tasarrufu gibi mutasarrıf olsun dedikde mûmâ-ileyh Ahmed Bey dahi meclis-i mezbûrda ammisi müşârün-ileyh İsmail Bey mahzarında, fi’l-vâki‘ hâl bast olunan minvâl üzre olup ben dahi ammim müşârün-ileyh İsmail Bey’in zimmetini babam müteveffâ-yı mezbûr cihet-i kefâletden emriyle Çavdar oğluna verdiği iki bin dört yüz elli guruş da‘vâsından ve Bey çiftliği demekle ma‘rûf çiftliğin sinîn-i müte‘addidede müctemi‘ beynimizde mikdârı ma‘lûm mahsûlleri da‘vâsından ve mevâşîsine yedirdiği mahsûllerden ve Mora’da olan çiftliklerim mahsûlünden Ahmed Efendi oğluna verilen sene kusûru üç yüz elli guruş da‘vâsından ve beynimizde ma‘lûm koyun ve bağ mahsûllerinden ve mârrü’z-zikr çiftliğin İlya Yahudi’ye verilen sene mahsûlü kusûru üç yüz elli guruş da‘vâsından ve sâir de‘âvî [50a] ve mütâlebâtdan ibrâ-i âm ile ben dahi ibrâ ve iskāt eyledim min ba‘d bir birimiz ile vechen mine’l-vücûh ve sebeben mine’l-esbâb da‘vâ ve nizâ‘ımız yokdur, zuhûr dahi ederse lede’l-hükkâmi’l-kirâm mesmû‘a ve makbûle olmasın deyicek ahadühümâ âharın kelimât-ı meşrûhasını vicâhen tasdîk ve şifâhen tahkīk etmeğin vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a ma‘an irsâl olunan Ali Beşe ile gelip alâ vukū‘ihî inhâ ve takrîr eylediklerinde mâ cerâ bi’l-ibtigā ketb ve imlâ olundu. Fî evâili Şevvâli’l-mükerrem li sene isteneyn ve seb‘în ve elf. Şuhûdü’l-hâl: Umdetü’l-vâsılîn eş-Şeyh Mehmed Efendi b. eş-Şeyh Ali bi Halvetîzâde, Zübtedü’s-sâlikîn eş-Şeyh Mehmed Efendi Vâ‘iz-i câmi‘-i Vâlide-i Cedîd, Fahrü’l-emâsil ve’l-e‘âzım Ahmed Ağa Ser-çavuşân-ı Dergâh-ı âlî sâbıkan, es-Seyyid Mehmed Emin İmâmzâde, Zahrü’l-e‘âlî ve’l-efâhim Ebûbekir Ağa tâbi‘-i Murtaza Paşa, Fahrü’l-kuzât Mehmed Efendi b. İbrahim, Mehmed Ağa b. Hamza serdâr-ı İznik sâbıkan, el-Hâc Mehmed Ağa b. Abdülganî kethüdâ-yı teberdârân-ı Ayşe Sultan, İbrahim Efendi b. Ramazan, es-Seyyid Mehmed Efendi allâme el-İmâm, Mustafa Efendi Hatîb-i Kasım Paşa-yı cedîd, el-Hâc Mehmed Seroda bölük 88, çorbacı İbrahim Ağa bölük 88, Hasan Ağa tâbi‘-i Murtaza Paşa, el-Hâc Ömer Dede b. İvaz el-Müezzin, Hâfız Mustafa Dede b. İslâm, es-Seyyid Sunullah Çelebi b. es-Seyyid Mehmed, Hüseyin Ağa tâbi‘-i Paşa-yı müşârün-ileyh ve gayruhüm mine’l-hâzırîn.