Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 248 Hüküm no: 253 Orijinal metin no: [55b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dökine bt. Dimitri’ye oğulları Todori ve Angeli’nin dörder akçe nafaka vermesi gerektiği Mahmiye-i İstanbul hısnı ebvâbından Eğrikapı dâhilinde vâki‘ Avcıbey mahallesi sâkinlerinden râfi‘atü’l-vesîka Dökine bt. Dimitri nâm nasrâniye meclis-i şer‘-i hatîr-i lâzımü’t-tevkīrde sadrî kebîr oğulları Todori ve Angeli veledey Duka nâm zimmîler muvâcehelerinde takrîr-i kelâm ve ta‘bîr ani’l-merâm edip ben fakīre kesb u kâra iktidârım olmayıp üzerlerine nafakam lâzım olan oğullarım merkūmân Todori ve Angeli mallarından kadr-i ma‘rûf nafaka farz ve takdîr olunmak matlûbumdur deyicek merkūme Dökine nasrâniyenin hâli ehl-i vukūf olan zimmîlerden istihbâr olundukda, merkūmenin fakrına ve nafakaya eşedd-i ihtiyâc olduğunu haber verdiklerinde hâkim-i muvakki‘-i sadr-ı kitâb hazretleri dahi beher yevm oğulları merkūmân Todori ve Angeli üzerlerine dörder akçe ki cem‘an sekiz akçe nafaka farz ve takdîr ve inde’z-zarûre istidâneye ve lede’z-zafer rücû‘a izin birle işbu vesîka-i enîka alâ mâ hüve’l-hakīka bi’l-ibtigā sebt olundu. Fi’l-yevmi’r-râbi‘ ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Çukadâr Ali Beşe, Dilâver Muhzır, Hasan Muhzır, Mehmed Beşe Muhzır, Hüseyin Beşe b. Hasan ve gayruhüm.