Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 247 Hüküm no: 252 Orijinal metin no: [55b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Veli Beşe b. Mehmed’in içki içmemek için şartlı talâkta bulunduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Takyecibaşı mahallesi sâkin[e]lerinden Gülmüş bt. Abdullah nâm hâtun meclis-i şer‘de zevci Veli Beşe b. Mehmed nâm kimesne mahzarında takrîr-i kelâm ve ta‘bîr ani’l-merâm edip zevcim mezbûr Veli dâimâ kâr u kesb üzre olmayıp iki senedir beni infâk ve iksâda tekâsül ve ta‘allül edip her-bâr şürb-i hamr ve arak ile mukayyed olmağın mezbûrun ezâ ve cefâsı kābil-i tahammül olmamağın min ba‘d hamr ve arak şürb etmemek üzre talâka şart etmişdir suâl olunsun dedikde gıbbe’s-suâl mezbûr Veli Beşe [cevâbında] fi’l-hakīka ba‘de’l-yevm şürb-i hamr ve arak edersem zevcem merkūme Gülmüş benden boş olsun deyû şart ve ta‘lîk etmeğin vâki‘ü’l-hâl mezbûre Gülmüş talebiyle ketb olundu. Fi’l-yevmi’s-sâdis ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Osman Beşe b. Abdullah, Mehmed b. Mahmud, Sâlih Efendi b. Mehmed, Ali Beşe Çukadâr ve gayruhüm.