Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 249 Hüküm no: 255 Orijinal metin no: [55b-4] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Siyavuş Efendi’nin borçlunun ölmesi üzerine vasîsi olduğu Fâtıma namına alacağını kefiller Yani v. Anastaş ve Drago v. Manol’den alması Havâss-ı Sultâniye kazâsına tâbi‘ Vidos nâm karyede sâkin Siyavuş Efendi b. ( ) kıbelinden da‘vâ-yı âti’z-zikre vekîl olup yine karye-i mezbûre sâkinlerinden Mustafa Çelebi b. Yusuf ve Durmuş b. Hasan şehâdetleriyle şer‘an vekâleti sâbite olan Mehmed Bey b. Ali nâm ser-bölük mahfil-i kazâda Cuhûd Burgaz demekle ma‘rûf karyede sâkin Yani v. Anastaş ve Drago v. Manol nâm zimmîler muvâcehelerinde bi’l-vekâle üzerlerine takrîr-i da‘vâ edip yine karye-i mezbûrede sâkin iken bundan akdem mürd olan Kiryaki v. Dimitri nâm zimmî bundan akdem hâl-i hayâtında müvekkilim mezbûrun sulbiye sagīre kızı Fâtıma’nın mâ-i mevrûsundan yüz on üç kıt‘a tâmmü’l-vezn sahîhü’l-ayâr riyâlî guruşu onu on bir buçuk hesâbı üzre istirbâh etmeğin meblağ-ı mezbûru edâ ve vasiyy-i mezbûr Siyavuş Efendi’ye teslîm üzre merkūmân Yani ve Drago emr ve kabûlü hâvî kefâlet-i sahîha-i şer‘iyye ile kefîl olmuşlar iken medyûn-ı merkūm mürd [olup] meblağ-ı mezbûru müvekkilim merkūm kefîlân-ı merkūmândan taleb eylediğinde teslîmden imtinâ‘ ederler suâl olunup alıverilmek bi’l-vekâle matlûbumdur deyicek gıbbe’s-suâl ve’l-inkâr ve akībe’l-istişhâd udûl-i ricâlden yine karye-i mezbûrede sâkin Osman Dede b. Mustafa ve Ahmed Beşe b. [Abdullah li ecli’]ş-şehâde makām-ı kazâya hâzırân olup istişhâd olunduklarında, fi’l-hakīka medyûn-ı mezbûr sagīre-i mezbûrenin mâl-ı mevrûsundan vasîsi müvekkil-i merkūm yedinden hesâb-ı mezbûr üzre yüz on üç kıt‘a tâmmü’l-vezn riyâlî guruş istirbâh eylediğinde merkūmân Yani ve Drago bizim huzûrumuzda meblağ-ı mezbûru edâ ve teslîme emr ve kabûlü hâvî kefâlet-i sahîha-i şer‘iyye ile kefîl bi’l-mâl olmuşlardır [56a] biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde ba‘de’t-ta‘dîl ve’t-tezkiyye şehâdetleri makbûle olmağın mûcebiyle ba‘de’l-hükm mâ hüve’l-vâki‘ bi’t-taleb ketb olundu. Tahrîren fi’l-yevmi’s-sâdis ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Fahrü’l-müderrisîni’l-kirâm Kapıcızâde Ahmed Efendi, Hamza Efendi nâib-i recül, Ali Beşe Çukadâr, Receb Kethüdâ b. Maden, Dilâver muhzır ve gayruhüm mine’l-hâzırîn.