Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 250 Hüküm no: 256 Orijinal metin no: [56a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Zaîm Ali Ağa’nın çalınan tüfek, kılıç ve diğer bazı eşyalarının da zanlılardan teslim alındığı Vilâyet-i Anadolu’da vâki‘ Söğüdcük demekle ma‘rûf ve mahallinde ze‘âmetinde mütemekkin Ali Ağa nâm za‘îm kıbelinden eşyâ-i âti’z-zikri taleb ve da‘vâ ve ahz ü kabz ve kendiye îsâle ve inde’l-hâce lede’l-hükkâm mürâfa‘a ve muhâsamaya ve iktizâ ederse sulh ve ibrâya vekîl olup vekâleten başmukāta‘acı efendi tevâbi‘inden Hüseyin b. İbrahim ve Mehmed b. Abdülkādir şehâdetleri ile sâbite olan Ali Bey b. Osman mahfil-i kazâda bâ‘isü’l-kitâb Hasan b. Abdullah mahzarında bi’l-vekâle ikrâr ve takrîr-i kelâm edip merkūm Hasan bundan akdem müvekkilim mezbûrun bir cevherdâr tüfenk ve bir Acem kılıcı ve bir neftî iskarlet müsta‘mel dolama ve bir kırmızı kalpak ve bir çift diz çakşırı ve bir kırmızı bogasi çiltiyan [çintiyan] ve bir don ve gömleğini hafiyyeten alıp firâr etmeğin ben dahi eşyâ-i mezkûrunu bi’l-vekâle taleb ve da‘vâ eylediğimde mezbûr Hasan mârrü’z-zikr kılıç [ve] tüfenkden mâ‘adâsını ikrâr etmeğin ben dahi sâlifü’z-zikr tüfenk ve kılıcı târih-i mezbûrda merkūm Hasan’ın ahz eylediğini şuhûd-ı udûl ile muvâcehesinde isbât eylediğimden sonra merkūm Hasan mârrü’z-zikr kılıç ve tüfengi bana teslîm ve sâlifü’z-zikr dolamayı dahi müvekkilim mezbûrun âhar hizmetkârı ol zamânda merkūm ile ma‘an firâr eden hâzır bi’l-meclis Ramazan nâm kimesne teslîm edip ben dahi bi’l-vekâle müvekkilim mezbûr için alıp kabz edip mâ‘adâ da‘vâsından mezbûr Hasan’ın zimmetini bi’l-vekâle ibrâ eyledim min ba‘d mezbûr Hasan ve merkūm Ramazan ile da‘vâm yokdur dedikde gıbbe’t-tasdîki’l-mu‘teber, mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Osman Beşe er-Râcil, kayıkçı Veli Beşe, Mehmed b. Mahmud, Hüseyin b. Hasan ve gayruhüm mine’l-hâzırîn.