Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 253 Hüküm no: 261 Orijinal metin no: [57a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Hasan Ağa b. Ahmed’in câriyesi Şahbaz bt. Abdullah’ı âzat etmesi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Takyecibaşı mahallesinde sâkin mefhar-i erbâbi’l-hayrât, zübdetü ashâbi’l-meberrât Hasan Ağa b. Ahmed nâm seroda-i sâbık meclis-i şer‘-i Muhammedî -sallallâhu te‘âlâ alâ şâri‘ihî-’de cemî‘-i tasarrufât-ı şer‘iyyesi nâfize olduğu hâlde ikrâr ve takrîr-i kelâm edip orta boylu açık kaşlı elâ gözlü kara yağız yüzünde çiçek alâmeti olan sâhibetü’l-kitâb Şahbaz bt. Abdullah nâm câriye-i memlûkemi ben vefât etmezden kırk gün mukaddem cemî‘ malımdan âzâd olmak üzre müdebbere eyledim küllü nefsin zâ’ikatü’l-mevt ve küllü hayyin yülâkīhi’l-fevt fehvâsı üzre bi emrillâhi te‘âlâ ben işbu dâr-ı dünyâdan sarây-ı ukbâya intikāl ve irtihâl etmezden kırk gün mukaddem cemî‘ malımdan âzâd olup sâir harâir-i asliyyât gibi hürre olsun deyicek mevsûfe-i mezkûre Hasan Ağa vefâtından evvel olan kırk gününde sahîh bulunursa mevsûfe-i mezkûr mezheb-i muhtâr ve mütfâ-bih üzre cümle üzre cümle malından âzâd olmak üzre işbu hurûf ketb olundu. Fi’l-yevmi’s-sâdis aşer min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Umdetü erbâbi’t-tahrîr ve’l-kalem İbrahim Efendi b. Ahmed, Mustafa Ağa b. Mehmed, Ahmed Çelebi b. Abdünnebî Râh-ı âbî, Receb Halîfe b. Maden, Mehmed Çelebi b. Abdülkādir ve gayruhüm mine’l-hâzırîn.