Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 252 Hüküm no: 260 Orijinal metin no: [56b-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Receb b. Halil’in parasının çalındığını iddiasının reddi Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Ali Paşa Bostanı demekle ma‘rûf bostanda bostancı olan Receb b. Halil nâm şâbb-ı emred mahfil-i kazâda yine tâife-i mezbûreden Hızır b. Hüseyin ve Mehmed b. Yusuf ve Osman b. Yunus ve Yusuf b. Hasan nâm kimesneler ile Garbid v. Yani ve Sefer v. Haçuk nâm Ermeniler muvâcehelerinde üzerlerine takrîr-i da‘vâ edip târih-i kitâbdan altı gün mukaddem mârrü’z-zikr bostanda kendi yatağımda başım altından iki bin sekiz yüz akçem zâyi‘ olmağın merkūmûn kimesneler ile mesfûrân Ermeniler mazannamdır suâl olunsun deyicek gıbbe’s-suâl ve’l-inkâr müdde‘î-i mezbûrdan meblağ-ı mârrü’z-zikri merkūmûn kimesneler ile merkūmân Ermeniler ahz eylediklerini mübeyyine beyyine taleb olundukda, ityân-ı beyyineden izhâr-ı acz ile istihlâf etmeğin merkūmûn kimesneler ile mesfûrân Ermenilere meblağ-ı mârrü’z-zikri almadıklarına ve âhar yediyle aldırmadıklarına vücûh-ı şer‘iyyeden biriyle ilimleri lâhık olmadığına yemîn teklîf olundukda, evvelen merkūmûn kimesneler yemîn billâhi te‘âlâ ve sâniyen mesfûrân Ermeniler dahi yemîn billâhi’llezî enzele’l-İncîle alâ İsâ -aleyhi’s-selâm- eylediklerinde müdde‘î-i mezbûr Receb ile’l-isbât bî-vech ta‘arruzdan men‘ birle mâ hüve’l-vâki‘ bi’t-taleb kayd şüd. Fi’l-yevmi’t-tâsi‘ ve’l-ışrîn min Şevvâli’l-mükerrem li sene isneteyn ve seb‘în ve elf. Şuhûdü’l-hâl: Hüseyin Beşe Kethüdâ-yı bostâniyân, Hasan b. Abdullah, Ali Beşe Çukadâr, Hamza Efendi nâib-i recül, es-Seyyid Mahmud Çelebi b. es-Seyyid Ali, Ahmed Çelebi b. Ahmed, Ali Çelebi el-Yesârî, Ali Bey b. Hüdâverdi, mumcu Ali Çelebi b. Üveys ve gayruhüm mine’l-hâzırîn.