Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 254 Hüküm no: 263 Orijinal metin no: [57a-3] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Halil’in satın aldığı yerin bir bölümünün Cafer Efendi Vakfı’na ait olduğu Havâss-ı Aliyye kazâsına tâbi‘ kasaba-i Hasköy’de vâki‘ merhûm Kiremitçi Ahmed Çelebi vakfı olan mu‘allimhânenin hâlâ berât-ı pâdişâhî ile halîfesi olan hâmilü’l-kitâb Mustafa Halîfe b. Sinan nâm kimesne meclis-i şer‘de yine merhûm-ı mezbûrun evkāfına meşrûtiyyet üzre bi’l-fi‘l mütevellî olan Mehmed Çavuş b. Ebûbekir mahzarında üzerine takrîr-i da‘vâ edip mu‘allimhâne-i mezkûrenin kadîmî halîfesi olmağla nice zamân hâlî ve mu‘attal kalmağın merhûm-ı mezbûr evkāfının mesârif-i mu‘ayyeneden fazlası li’z-zekeri mislü hazzi’l-ünseyeyn evlâdına şart etmekle târih-i kitâbdan bir sene mukaddem vakfa intikāl edip mahlûlden Süleyman Paşa’ya îcâr olunan kiremithâne hissesinin vakf için alınan îcâre-i mu‘accelesinden izn-i şer‘-i şerîf ve ma‘rifet-i evlâd ile yirmi iki bin akçesi ifrâz ve meblağ-ı mezbûr merhûm-ı mezbûrun sâir evkāfına zam ve ilhâk ve istirbâh ve istiğlâl olunup murâbahası mu‘allimhâne-i mezkûre halîfesine vazîfe olmak üzre ta‘yîn ve tahsîs olunup mütevellî-i mezbûr dahi meblağ-ı mezbûru kendi zimem olmak üzre kabz ve üzerine ilzâm-ı ribh-i şer‘î olunmuş iken hâlâ vazîfem olmak üzre ne meblağ-ı mezbûrun murâbaha-i şer‘iyyesini verir ve ne asl-ı mâl-ı vakf-ı mezbûru âhara zimem eder suâl olunup takrîri tahrîr ve meblağ-ı mezbûrun tahsîli matlûbumdur deyicek gıbbe’s-suâl mütevellî-i mezbûr cevâbında fi’l-hakīka hâl minvâl-i muharrer üzre olmuşdur, zikr olunan yirmi iki bin akçe ile’l-ân zimmetimde edâsı lâzım deynimdir deyû bi tav‘ihî ikrâr etmeğin alâ mûcebi ikrârihî zikr olunan yirmi iki bin akçeyi vakfa edâ ve teslîm ile mütevellî-i mezbûr ilzâm ve rehn-i kavî ve kefîl-i melî ile murâd eden kimesnelere istirbâha tenbîh-i şer‘î olunup mâ hüve’l-vâki‘ kayd şüd. Fi’l-yevmi’s-sâlis ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Es-Seyyid Mehmed Çelebi b. es-Seyyid Mustafa evlâd-ı vâkıf, Mehmed Bey b. Abdullah, Mustafa Çavuş b. İbrahim, Ali Beşe b. Emrullah, Mehmed Muhzır ve gayruhüm mine’l-hâzırîn.