Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 265 Hüküm no: 272 Orijinal metin no: [59b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Pîr Mehmed Çelebi b. Mahmud’un evini Mehmed Halife b. Sefer Hâce’ye satması Mübâya‘a-i câ’iyetü’z-zikrin mahallinde tahrîri iltimâs olunmağın küttâb-ı mahkeme-i şerîfeden mevlânâ Sâlih Mehmed Efendi irsâl olunup ol dahi zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Şeyh Ahmed mahallesinde sâkin olan hâlâ Otakçıbaşı mahallesi imâmı olan Mehmed Halîfe b. Sefer Hâce’nin menziline varıp akd-i meclis-i şer‘ eylediğinde yine mahalle-i mezbûre sükkânından Pîr Mehmed Çelebi b. Mahmud meclis-i ma‘kūd-ı mezkûrda mezbûr Mehmed Halîfe mahzarında ikrâr ve takrîr-i kelâm edip mahalle-i mezbûrede sâkine iken bundan akdem fevt olup verâseti bana munhasır olan vâlidem Ayşe bt. Kubad nâm müteveffiyeden bi’l-irsi’ş-şer‘î bana isâbet ve intikāl eden emlâkden mahalle-i mezbûrede vâki‘ bir tarafdan İsmihan Hâtun mülkü ve bir tarafdan Yakub Ağa vakfı ve bir tarafdan Mehmed Çelebi mülkü ve bir tarafdan tarîk-i âm ile mahdûd iki bâb fevkānî oda ve bir hamam ve matbah ve iki sofa ve bir ahır-ı kebîr ve iki kenîf ve zât-ı eşcâr-ı müsmire ve gayr-ı müsmireyi müştemil olan menzilimi vâlidem müteveffât-ı mezbûre iki yüz kıt‘a riyâlî guruş-ı kebîre Hamza Çavuş ve Ferruh Bey mütevellîsi Mehmed Efendi’ye alâ tarîki’l-istiğlâl bey‘ ve teslîm ve kabz-ı semen ve icâre-i ma‘lûme ile müddet-i ma‘lûme tamâmına değin istîcâr etmiş iken fevt olmağın hâlâ meblağ-ı mezbûrun aslı iki yüz guruş ve menzil-i mezbûr icâre[si] beş bin dört yüz akçeyi vakfeyn-i mezbûreyne hâlâ mütevellî olan Mustafa Çelebi’ye edâ ve teslîm, ol dahi kabz ve tesellüm ve fekk-i istiğlâl eyledikden sonra mezbûr Mehmed Halîfe’ye on sekiz bin akçe olmak üzre iki yüz kıt‘a tâmmü’l-vezn sahîhü’l-ayâr riyâlî guruş ile altı bin fıddî nakd-i râyic fi’l-vakt akçe ki cem‘an yirmi dört bin akçeye tarafeynden îcâb ve kabûlü hâvî bey‘-i sahîh-i kat‘î ile bey‘ ve teslîm, ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t yirmi dört bin akçeyi iki yüz riyâlî guruş mâ‘adâ altı bin hurda akçe müşterî-i mezbûr Mehmed Halîfe yedinden tamamen alıp kabz eyledim ba‘de’l-yevm menzil-i mahdûd-ı mezkûr merkūm Mehmed Halîfe’nin mülk-i müşterâsı ve hakk-ı sarîhidir, keyfe mâ yeşâ’ mutasarrıf olsun dedikde gıbbe’t-tasdîki’l-mu‘teber vakfeyn-i mezbûreyne hâlâ mütevellî olan mezbûr Mustafa meclis-i mezbûrda asl-ı mâl-ı vakfeyn-i mezbûreyn iki yüz riyâlî guruş ve beş bin dört yüz akçe icâre-i menzil-i mezbûru kable hâze’l-bey‘ bâyi‘-i mezbûr yedinden alıp vakf için kabz ve fekk-i istiğlâl eylemişdir deyû tav‘an ikrâr ve i‘tirâf etmeğin vâki‘ü’l-hâli mevlânâ-yı mezbûr mahallinde tahrîr, ba‘dehû meclis-i şer‘a [gelip] alâ vukū‘ihî inhâ ve takrîr etmeğin mâ hüve’l-vâki‘ kayd şüd. Fi’l-yevmi’s-sâmin aşer min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Receb Çavuş el-Mübâşir, Mehmed Efendi b. Hasan el-Müderris, Mehmed Çelebi b. Ahmed, Ramazan Çelebi b. Halil, Seydi Bey b. Kubad, Bağdâdî Mehmed Çelebi, Ahmed Çelebi el-Müezzin, Hasan Hâce b. Ömer, Ali Çelebi b. Seydi ve gayruhüm mine’l-hâzırîn.