Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 264 Hüküm no: 271 Orijinal metin no: [59b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdi Çelebi b. Yusuf’un hayattayken câriyesi Bedehşan bt. Abdullah’ı âzat etmiş olduğu Medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de vâki‘ Ali Paşa mahallesinde sâkin iken bundan akdem fevt olan Çukadâr Abdi Çelebi b. Yusuf’un akdem câriye-i memlûkesi işbu orta boylu açık kaşlı elâ gözlü Eflakiyyetü’l-asl sâhibetü’l-vesîka Bedehşan bt. Abdullah meclis-i şerî‘at-ı şerîfede mevlâsı müteveffâ-yı mezbûrun sulbiye kebîre kızı Hatice nâm hâtun tarafından husûs-ı âti’z-zikri da‘vâya vekîli olup mezbûrenin zâtını ma‘rifet-i şer‘iyye ile ârifân olan İbrahim Beşe b. Hasan ve Ahmed Çelebi b. Ali şehâdetleriyle şer‘an vekâleti sâbite olan zevci Mehmed Bey b. Abdullah nâm vekîl mahzarında üzerine da‘vâ ve takrîr-i kelâm edip seyyidim müteveffâ-yı mezbûr hâl-i hayâtında ve kemâl-i akl-i sıhhatinde fevtinden altı ay mukaddem huzûr-ı müslimînde beni cemî‘ malından ifrâz [ve] i‘tâk ve tahrîr etmiş iken bundan akdem mezbûre bana rık olmak üzre vaz‘-ı yed etmeğin bin yetmiş iki senesi Recebü’l-müreccebi’nin gurresinde mahmiye-i Galata’da kassâm-ı askerî olan Mehmed Nâlî Efendi huzûrunda minvâl-i muharrer üzre ıtkımı isbât ve yedime hüccet-i şer‘iyye verilmiş iken hâlâ yine mezbûre bana rık olmak üzre vaz‘-ı yed eder suâl olunup sebîlim tahliyye olunmak matlûbumdur deyû kassâm-ı askerî olan mûmâ-ileyh Mehmed Nâlî Efendi imzâsıyla mümzâ ve hatmiyle mahtûm takrîrine vech-i muharrer üzre hüccet-i şer‘iyye ibrâz edicek gıbbe’l-istintâk vekîl-i mezbûr Mehmed Bey mazmûn-ı hüccet-i merkūmeyi bi’l-vekâle inkâr etmeğin mezbûr Bedehşan mazmûn-ı hüccet-i merkūmeyi mübeyyine beyyine taleb olundukda, zeyl-i hüccetde isimleri mastûr olan şuhûddan mahalle-i mezbûre imâmı fahrü’l-eimme Mustafa Efendi b. Muhammed ve el-Hâc İvaz Bey b. Hasan li ecli’ş-şehâde mahfil-i kazâya hâzırân olup istişhâd olunduklarında, fi’l-hakīka mezbûre Bedehşan müvekkile-i mezbûre Hatice Hâtun’dan târih-i mezkûrda mahmiye-i mezbûrede kassâm-ı askerî olan mûmâ-ileyh Mehmed Nâlî huzûrunda vech-i muharrer üzre da‘vâ ol dahi inkâr etmeğin mezbûre Bedehşan ber minvâl-i muharrer ıtkı alâ vechi’l-hatîr isbât etmeğin kassâm-ı mûmâ-ileyh işbu hüccet-i şer‘iyyeyi bizim huzûrumuzda ketb ve tahrîr ve mezbûre yedine vermiş idi. Hüccet-i mezbûre kassâm-ı mûmâ-ileyhin hat ve hatmi muhtevîdir biz bu husûsa vech-i muharrer üzre şâhidleriz, şehâdet dahi ederiz deyû her biri edâ-i şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebiyle müvekkile-i mezbûre Hatice Hâtun bî-vech ta‘arruzdan men‘ olunup mâ cerâ bi’l-ibtigā sebt olundu. Fi’l-yevmi’s-sâdis aşer min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Solak Ali Çelebi b. Halil, Şaban Bey b. Hasan, İbrahim Beşe b. Hasan, Mehmed Efendi b. İlyas, Abdullah Çelebi b. Abdullah ve gayruhüm mine’l-hâzırîn.