Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 268 Hüküm no: 274 Orijinal metin no: [60a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim’in vârislerinden hanımı Rahime’nin miras hissesini almak için vekâlet vermesi Husûs-ı âti’l-beyânı mahallinde ketb ve tahrîr için bi’t-taleb irsâl olunan mevlânâ Sâlih Mehmed Efendi b. Mehmed ol dahi zeyl-i kitâbda muharrerü’l-esâmî olan müslimîn ile medîne-i Hazret-i Ebâ Eyyûb el-Ensârî -dâme fî rıdvâni’l-Bârî-’de Nişancı Paşa mahallesinde sâkin iken bundan akdem vefât eden İbrahim b. ( ) menziline varılıp akd-i meclis-i şer‘-i şerîf eylediğinde müteveffâ-yı mezbûrun verâseti zevce-i metrûkesi Rahime bt. ( ) nâm hâtun ile li ebeveyn ammisi oğlu Mehmed Beşe b. Turâbî nâm kimesneye munhasıra olduğu şer‘an zâhir ve müte‘ayyin oldukdan sonra mezbûre Rahime meclis-i ma‘kūd-ı mezkûrda ikrâr-ı tâm ve takrîr-i kelâm edip zevcim mûrisim müteveffâ-yı mezbûr İbrahim’den bi’l-irsi’ş-şer‘î bana isâbet ve intikāl eden rub‘ hisse-i şer‘iyye-i şâyi‘amı mecmû‘-ı muhallefâtına vâzı‘ü’l-yed olan li ebeveyn ammisi oğlu mezbûr Mehmed Beşe’den taleb ve ahz ü kabz ve bana îsâle ve inde’l-hâce lede’l-hükkâmi’l-kirâm -kesserhümullâhü’l-melik- mürâfa‘a ve muhâsamaya ve kabz [ve] îsâle mütevakkıf olduğu umûrun küllîsine işbu râfi‘ü’l-kitâb Abdurrahman Çelebi b. Ahmed’i tarafımdan vekîl ve nâib-i menâb nasb ve ta‘yîn eyledim dedikde ol dahi vekâlet-i mezbûreyi kabûl ve hıdemât-ı lâzımesini edâya müte‘ahhid olmağın vâki‘ü’l-hâli mevlânâ-yı mezbûr mahallinde tahrîr ba‘dehû meclis-i şer‘a [gelip] alâ vukū‘ihî inhâ ve takrîr etmeğin mâ cerâ kayd şüd. Fi’l-yevmi’l-ışrîn min Şa‘bâni’l-mu‘azzam li sene isneteyn ve seb‘în ve elf. Şuhûdü’l-hâl: Mehmed Efendi el-İmâm, Ali Bey el-Müezzin, Mehmed Bey el-Cündî, Mustafa Çelebi b. İbrahim, Dilâver b. Abdullah ve gayruhüm mine’l-hâzırîn.