Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 278 Hüküm no: 280 Orijinal metin no: [62a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Angeliki’nin terekesinden olan bağın mirasçıları tarafından Panayot v. Yani’ye satılması Husûs-ı âti’l-beyânı mahallinde tahrîr iltimâs olunmağın bi’t-taleb irsâl olunan mevlânâ Sâlih Mehmed Efendi b. Mehmed ol dahi zeyl-i kitâbda muharrerü’l-esâmî olan müslimîn ile Havâss-ı Aliyye kazâsına tâbi‘ Bahçe-i Belgrad nâm karyeye varılıp akd-i meclis-i şer‘ olundukda, yine karye-i mezbûrede sâkin iken bundan akdem hâlik olan Angeliki v. ( ) nâm zimmînin verâseti, sulbî kebîr oğlu Yamandi ve sulbiye kebîre kızları Fotini [ve] Anbarni nâm nasrâniyelere munhasıra olduğu şer‘an zâhir ve müte‘ayyin oldukdan sonra mezbûr Yamandi ve merkūme Fotini asâleten ve mersûme Anbarni tarafından bey‘-i âti’z-zikre ve kabz-ı semene vekîl olup vekâleti Panayot v. Nikola ve Kosta v. Aleksi şehâdetleriyle şer‘an sâbite olan Panayot v. Lanbotona nâm zimmî vekâleten meclis-i şer‘de işbu râfi‘ü’l-vesîka diğer Panayot v. Yani nâm zimmî muvâcehesinde her biri bi’l-asâle ve bi’l-vekâle ikrâr ve takrîr-i kelâm [edip] akd-i âtî sudûruna değin silk-i mülk-i sahîhimde münselik olan emlâkimizden karye-i mezbûrede vâki‘ bir tarafdan Todori bağı ve bir tarafdan Arabacıoğlu çayırı ve bir tarafdan Beruze nâm efrenc bağı ve bir tarafdan tarîk-i âm ile mahdûd zât-ı eşcâr-ı müsmire ve gayr-ı müsmireyi muhtevî mülk bağımı merkūm diğer Panayot’a bin altı yüz nakd-i râyic fi’l-vakt akçeye tarafeynden îcâb ve kabûlü hâvî bey‘-i bâtt-ı sahîh-i kat‘î ile her birimiz bi’l-asâle ve bi’l-vekâle bey‘ ve teslîm eylediğimizde ol dahi vech-i muharrer üzre iştirâ ve tesellüm ve kabz ve kabûl edip semeni olan mezbûrü’n-na‘t bin altı yüz akçeyi tamamen asâleten vekâletim hasebiyle merkūm diğer Panayot yedinden alıp kabz eyledik ba‘de’l-yevm bağ-ı mahdûd-ı mezkûrda vechen mine’l-vücûh alâkamız kalmadı müşterî-i mezbûrun mülk-i mahz-ı müşterâsı ve hakk-ı sarîhidir, keyfe mâ yeşâ’ mutasarrıf olsun dediklerinde gıbbe’t-tasdîki’l-mu‘teber vâki‘ hâli mevlânâ-yı mezbûr mahallinde tahrîr, ba‘dehû meclis-i şer‘a gelip alâ vukū‘ihî inhâ ve takrîr etmeğin mâ hüve’l-vâki‘ kayd şüd. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Fahrü’l-emâsil Mehmed Ağa Zâbit-i karye-i m[ezbûr], el-Hâc İbrahim Efendi Ser-bölük, İsmail Çelebi Râh-ı âbî, Sinan Bey b. Ali, Receb Kethüdâ ve Pandazi Kethüdâ, Paroş v. Andriye, Sakosta v. Yanaki, Todoş v. Yanaki, Andon v. Apostol, diğer Yorgi v. Dimo ve gayruhüm mine’l-hâzırîn.