Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 277 Hüküm no: 279 Orijinal metin no: [62a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Çiço çiftliğinde öldürülmüş olan Balaban’ın muayenesi Havâss-ı Aliyye kazâsına tâbi‘ Topçular nâm karye kurbunda vâki‘ Çiço Çiftliği demekle ma‘rûf çiftliğin mâliki olan râfi‘ü’l-kitâb Süleyman Ağa b. Abdüsselâm meclis-i şer‘a gelip takrîr-i kelâm edip. merhûm ve mağfûrun-leh Sultan Bayezid Hân-ı Velî evkāfı arâzisinden olup sâlifü’z-zikr çiftliğe intimâ ile tahdîd ve tavsîfden müstağnî ile’l-ân taht-ı tasarrufumda olup çiftlik-i mezbûr mukābelesinde olan tarlamda vâki‘ ağıl içinde, işbu târih-i kitâb gecesi Balaban nâm çoban maktûlen hâlik olmuşdur hâlâ taraf-ı şer‘-i kavîmden üzerine varılıp keşf ve tahrîr olunmak matlûbumdur deyicek kıbel-i şer‘-i şerîfden mevlânâ Mehmed Efendi b. Hasan irsâl olunup ol dahi hâlâ Küçük Hâslar’da zâbitü’l-vakt olan Mehmed Beşe nâm râcil ve zeyl-i vesîkada muharrerü’l-esâmî olan müslimîn ile katîl-i mezbûrun üzerine varılıp eser-i cerâhati tefahhus olundukda, fi’l-hakīka merkūm Balaban’ın başında dört yerde nacak yarası ile maktûlen mârrü’z-zikr tarlada ağıl kurbunda mürd olmuş yatar idiği mevlânâ-yı mezbûr zâbit-i mersûm muvâcehesinde mahallinde keşf ve tahrîr, ba‘dehû ma‘an irsâl olunan Mehmed Beşe ile meclis-i şer‘a gelip alâ vukū‘ihî inhâ ve takrîr eylediklerinde mâ vaka‘a bi’t-taleb kayd şüd. Fi’l-yevmi’r-râbi‘ ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Mustafa Çelebi b. Süleyman, Bereket Beşe b. Abdullah, Süleyman Beşe b. Ahmed, Musa Beşe b. Mehmed, Mahmud Beşe b. Musli, Mehmed Beşe b. Mustafa, Hasan Beşe b. Abdullah ve gayruhüm mine’l-hâzırîn.