Eyüb Mahkemesi (Havass-ı Refia) 74 Numaralı Sicil (H. 1072 - 1073 / M. 1661 - 1662) cilt: 28, sayfa: 279 Hüküm no: 282 Orijinal metin no: [62b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Abdullah’ın parmağını kestiği Emetullah bt. Ali’ye diyet vermesi Havâss-ı Aliyye kazâsı tevâbi‘inden Terkos nâhiyesine tâbi‘ Su Nâzırı karyelerinden Çiftalan nâm karyede sâkine bâ‘isetü’l-kitâb Emetullah bt. Ali nâm hâtun meclis-i şer‘-i kavîm-i lâzımü’t-tekrîmde yine karye-i mezbûrda sâkin olup akrabâsından olan Mehmed b. Abdullah nâm kimesne mahzarında üzerine da‘vâ ve takrîr-i kelâm edip târih-i kitâbdan on gün mukaddem ben karye-i mezbûrede vâki‘ menzilimde kendi hâlimde dururken mezbûr Mehmed beni harbe ile darb ve sol elimin sırça parmağını kat‘ ve yanında olan parmağımı dahi mecrûh edip amelden koymuşdur, hâlâ suâl olunup mûcebi icrâ olunmak matlûbumdur deyicek mecrûha-i mezbûrenin cerâhatine nazar olundukda, fi’l-vâki‘ sol elinin serçe parmağı kat‘ olunduğundan mâ‘adâ sırça parmağı yanında olan parmağı dahi mecrûh idiği mukarrer ve muhakkak olmağın timar eden cerrâhlardan suâl olundukda, fi’l-vâki‘ amelden kalmışdır deyû haber vermeğin vâki‘ hâl cârih-i merkūm Mehmed’den suâl olundukda, fi’l-vâki‘ mecrûha-i mezbûreyi târih-i mezbûrda vech-i muharrer üzre harbe ile darb ve parmaklarını kat‘ eylemişimdir deyû bi tav‘ihî ikrâr ve i‘tirâf etmeğin kütüb-i fıkhiyye-i mu‘teberâtda, ve fî küllî usbu‘in mine’l-esâbi‘i’l-yedeyn evi’r-ricleyn öşrü’d-diyet deyû mastûr ve mukayyed bulunmağın cârih-i mezbûrun ikrârı mûcebince mecrûha-i mezbûrenin her parmağı için öşr-i diyete hükm olunup mâ hüve’l-vâki‘ bi’t-taleb kayd şüd. Fi’l-yevmi’s-sâlis ve’l-ışrîn min Zilka‘deti’ş-şerîfe li sene isneteyn ve seb‘în ve elf. Şuhûdü’l-hâl: Hasan Çelebi tâbi‘-i Nâzır Ağa, Sefer Çelebi b. Ramazan, el-Hâc Hüseyin b. Hasan, Mehmed Çelebi b. Musli, Mehmed Çelebi b. Ömer ve gayruhüm mine’l-hâzırîn.